«Ցեղասպանությունը շատերի համար քաղաքական բիզնես է դարձել»,- «Առաջին լրատվական»-ի հետ զրույցում այս մասին ասաց Գրեմմի մրցանակակիր, երգահան, երգիչ Արտո Թունջբոյաջյանը:
«Ապրիլի 24-ը չպետք է սև գաղափար դառնա, խնդիրը վաղվա պատկերացումն է: Ինձ համար ուրախալի է, որ չկարողացան վերացնել հայ ազգին: Կարևոր օրը ապրիլի 25-ն է. ուր ենք գնում, ինչպես ենք միավորվելու, ինչպիսին պիտի լինի Հայաստանը՝ հայ ազգի տունը, դրսում ապրող հայերը ինչպես պետք է զգան, որ իրենց կենտրոնն այստեղ է: Պետք է մի քիչ կենտրոնանանք այս հարցերի վրա և լավ հարթակներ սարքենք մեր երիտասարդների համար, որովհետև մեր ամենազորավոր զենքը միտքն է, որով ամբողջ աշխարհը կարող ենք նվաճել: Բայց մեր ստեղծածի ստրուկը չպետք է դառնանք, կյանքի ու մեր արժեքների մասին չպետք է մոռանանք: Ստեղծագործող, խիղճ ունեցող, իր անկեղծ մտքերով աշխարհի հետ կիսվողն է ինձ համար հայը»:
Ա. Թունջբոյաջյանի դիտարկմամբ՝ փոփոխություն, անշուշտ, նկատվում է Հայաստանում. «Մաֆիոզ մտքով կառավարումից եկանք ինտելեկտով կառավարմանը: Բայց եթե միտք չունես, ժողովրդին ինտելեկտուալ ստրուկ կդարձնես: Կարևոր է, որ բացատրվի այն միտքը, թե ուր ենք ուզում հասնել 5 տարի հետո… Կառավարությունը պետք է այդ մասին հայտարարի, իրենք են «վարոդը», չէ՞»:
«Հայաստանում պետք է վերջ դրվի դրսի հայ – հայաստանցի ստերիոտիպին: Կարո՞ղ եք ասել Սփյուռքից մի հոգի, որ այսօր այստեղ պաշտոն ունի: Ես 20 տարի է այստեղ եմ, բայց մի օր մշակույթի նախարարությունից մի բան չառաջարկեցին… Ով որ լավ է անում գործը, նրան պետք է գտնեն: Աշխարհի տարբեր երկրներում ապրող հայերը պետք է զգան, որ մեկ միասնական համակարգի մեջ են: Դրա համար հանդիպումներ պետք է կազմակերպել, և ասել՝ ովքեր ունեն առողջ միտք, դռները բաց են բոլորի համար»:
Մանրամասն՝ տեսանյութում: