Հեղափոխությունն արդեն մեկ տարեկան է. մեկ տարի առաջ այս օրը Ս. Սարգսյանը ճնշումների ներքո հրաժարական տվեց: Մեկ տարի անց ի՞նչ արդյունք է գրանցվել. ներկայիս կառավարությունն արդյո՞ք ունի հստակ տեսլական, ռազմավարություն, հայեցակարգ և այդ ամենն իրագործելու համար ճանապարհային քարտեզ: Թեմայի շուրջ «Առաջին լրատվական»-ի հետ քննարկմանն այս և մի շարք այլ հարցերի անդրադարձան հանրային ֆինանսների և կառավարման փորձագետ Հովհաննես Ավետիսյանը և տնտեսական զարգացման նախաձեռնությունների կենտրոնի հասարակայնության հետ կապերի բաժնի ղեկավար Նարինե Մեհրաբյանը:
«Անկախ նրանից, թե ինչ գործընթացներ են տեղի ունենում, 2018թ. ապրիլի 23-ին Ս. Սարգսյանի հրաժարականը կարևոր իրադարձություն էր»,- նշեց Հովհաննես Ավետիսյանը: Նրա դիտարկմամբ՝ կառավարությունը հստակ տեսլական չունի. «Եթե լիներ, ապա դա կառավարության ծրագրում պետք է արտացոլված լիներ, պետք է տեսնեինք զարգացման ռազմավարություններ, սակայն չենք տեսնում»:
Հանրային ֆինանսների և կառավարման փորձագետի խոսքով՝ կառավարության գործը ոչ թե աշխատատեղեր ստեղծելն է, այլ պետական գործիքներով նպաստելը տնտեսության զարգացմանը: Նրա դիտարկմամբ՝ տնտեսական թիրախները հստակ չեն, և հասկանալի չէ՝ ինչ ռեսուրսներ են պետք:
Նարինե Մեհրաբյանի խոսքով՝ տնտեսական հեղափոխություն հասկացություն գոյություն չունի. «Եթե խոսքը տնտեսական հրաշքին է վերաբերում, ապա դա ակնկալելու համար պետք է ունենալ հստակ ռազմավարություն, ճանապարհային քարտեզ և հերթական քայլերի իրականացում: Ամփոփելով տարին՝ կարող ենք ասել, որ ցուցանիշները շատ տարբեր են՝ կան ոլորտներ որտեղ աճ է գրանցվել, և կան ոլորտներ որտեղ անկում է գրանցվել»:
Մանրամասն՝ տեսանյութում:
