2018թ. ապրիլի 23. «Նիկոլը ճիշտ էր, ես սխալվեցի». մեկ տարի է անցել Ս. Սարգսյանի հրաժարականից և նրա այս հայտարարությունից: «Հասկանալու համար, թե ինչում էր ճիշտ Ն. Փաշինյանը, պետք է հիշենք, թե ինչ էր ասում նա մինչև հեղափոխությունը: Նրա հիմնական ուղերձն այն էր, որ յուրաքանչյուրս պետք է քայլ անենք, եթե ուզում ենք, որ մեր երկրում փոխվի իրավիճակը: Եվ տեսանք, որ հարյուր-հազարավոր մարդիկ արեցին այդ քայլը: Հավանաբար առաջին հերթին հենց նրանում էր ճիշտ, որ մարդիկ պատրաստ էին այդ քայլն անելու,- «Առաջին լրատվական»-ի զրույցում այս մասին ասաց ԱԺ «Իմ քայլը» խմբակցության պատգամավոր Վարազդատ Կարապետյանը: -Հիմա մեր երկրի հետագա կառուցման ամենամեծ հույսն այն է, որ մարդիկ կշարունակեն քայրեր անել: Առաջին քայլի հաջողությունը խթան է, որ մարդիկ շարունակեն քայլեր անել, մի մարդով չի լինի երկիրը կառավարել, մեկ մարդը ոչինչ չի կարող անել»:
Պատգամավորի դիտարկմամբ՝ բեկումնային իրավիճակ է. «Նախ պետք է քանդենք, հետո կառուցենք, հիմա որոշ համակարգեր արդեն քանդվել են, որոշները քանդվում են, որոշները՝ կառուցվում: Նախկին համակարգին բնորոշ գծեր կան, որոնք դեռևս պահպանվում են՝ առաջին հերթին մեր բնավորության մեջ, բայց կան նաև նոր գծեր: Հինը և նորը կոնֆլիկտի մեջ են, հնի և նորի հակամարտությունը դեռևս պահպանվում է: Հազարավոր մարդիկ ուզում են նոր երկիր ունենալ և պատրաստ են այդ ուղղությամբ քայլ անել, բայց կան նաև անթիվ մարդիկ, ովքեր դեռևս պատրաստ չեն գործողությունների դիմել, հին տրամաբանության մեջ են շարժվում, որովհետև դժվար է սեփական եսի փոփոխությունը: Բայց հույսն այն մարդիկ են, ովքեր փոխվում են, նրանք պետք է ներգրավվեն գործընթացների մեջ և պատասխանատվություն ստանձնեն»:
Մանրամասն՝ տեսանյութում: