Այսուհետ ապրիլին կնշենք նոր տոն. Քաղաքացու օրը շարժական տոն է, նշվելու է ապրիլի վերջին շաբաթ օրը, այս տարի այն կնշվի ապրիլի 27-ին: Այս տոնն ընդգրկելու է ոչ միայն Երևանը, այլ նաև ՀՀ բոլոր մարզերը, և նշվում է, որ այն կոչված է նաև կրթական դերակատարում ունենալու, քաղաքացի ձևավորելու, քաղաքացու իստիտուտի կայացմանը խթանելու:
Թեմայի շուրջ «Առաջին լրատվական»-ի հետ զրույցում իրենց դիտարկումները ներկայացրին Երևանի ավագանու «Իմ քայլը» խմբակցության անդամ, ճարտարապետ Արսեն Կարապետյանը և «Քաղաքացու որոշում» կուսակցության ԳՄ անդամ Գարեգին Միսկարյանը:
«Լավ է, որ ուրախ տոները շատ լինեն, մենք ավելի շատ սգո օրեր ենք նշում, քան տոներ, բայց այս տոնը դեռևս բովանդակությունից զուրկ է, թե ինչքանով կհաջողվի բովանդակություն լցնել ձևի մեջ, ժամանակը ցույց կտա, առայժմ դեռ այդպիսի կոնկրետ առաջարկներ չեմ տեսնում: Բովանդակությունից կախված կլինի՝ լավ է, թե վատ այդ տոնն ունենալը»,- նշեց Գարեգին Միսկարյանը: Նրա խոսքով՝ քաղաքացի կրթելը տևական գործընթաց է, որի բաղադրիչները շատ են և միայն տոն նշելով՝ քաղաքացի կրթելը աբսուրդ է, այլ հարց է, որ այդ տոնը նշելով՝ արժևորվում է քաղաքացու դերը:
Արսեն Կարապետյանն ընդգծեց, որ տոնը կդառնա տոն այն դեպքում, երբ այն կնշվի ինքնաբուխ: «Քաղաքացի կրթելու համար պետք է չափազանց լրջությունից դուրս գալ. մարդիկ պետք է տեսնեն, որ պետության քաղաքացի լինելը նաև ուրախություն է, և այս տոնի տարրերից մեկն էլ դա է»:
Անդրադառնալով ԿԳ նախարար Ա. Հարությունյանի դիտարկմանը, որ Անկախության տոնից հետո Քաղաքացու օրը երկրորդ կարևոր տոնն է, Ա. Կարապետյանը նշեց, որ ցանկացած բան պետք է նախ ժամանակի փորձությունն անցնի, և սարսափելի չէ, եթե չձևավորվի այդ տոնը նշելու ավանդույթ:
Գ. Միսկարյանը հավելեց, որ Ա. Հարությունյանի միտքը հավանաբար ավելի շատ ոչ թե տոնի, այլ պետության մեջ քաղաքացու դերի կարևորությանն է վերաբերում:
Մանրամասն՝ տեսանյութում: