«Ինչպես երեկ ասաց ՀՌՀ նախագահ Տիգրան Հակոբյանը՝ աշխարհում չկա մի երկիր, որը Հանրային մուլտիպլեքսով հեռարձակի այլ պետությունների արտադրանքները. միակը Հայաստանն է: Սակայն սա չի նշանակում, որ արտասահմանյան հեռուստաալիքները չեն կարող սփռվել Հայաստանում կամ որևէ այլ երկրում, պարզապես խողովակը, որի միջոցով պետք է հեռարձակվեն, չի կարող լինել Հանրայինը»,- «Առաջին լրատվական»-ի հետ զրույցում ասաց «Իմ քայլը» խմբակցության պատգամավոր Նարինե Խաչատուրյանը:
Մեր զրուցակցի կարծիքով՝ այս հարցն իսկապես լուրջ քննարկումների և օրենսդրական կարգավորման կարիք ունի. «Վստահ եմ, որ Ազգային ժողովում այդ քննարկումները տեղի կունենան, որպեսզի ապահովագրեն մեր պետությունը երրորդ երկրների՝ եթերային ճանապարհով անցանկալի միջամտություններից կամ կոչերից: Պիտի նստենք սեղանի շուրջ և հասկանանք՝ ինչպե՞ս պետք է սա արվի, և հնարավո՞ր է անել, թե՞ ոչ»:
Պատգամավորը, սակայն, ավելի կարևոր է համարում, թե մենք ինչ ենք արտադրում և մատուցում մեր հեռուստալսարանին. «Հայաստանի լեգիտիմ իշխանությունները չունեն կամ գրեթե չունեն սեփական լրատվամիջոցներ: Որոշ դեպքերում սա շատ մեծ մարտահրավեր է, որովհետև, ինչպես տեսնում ենք, կան փորձեր խարխլելու պետական հիմքերը»:
Առավել մանրամասն՝ տեսանյութում: