Իսլանդիայում խորհրդարանականներն առաջարկել են ընունել որոշում, համաձայն որի՝ երկրում ծխախոտը կվաճառվի միայն դեղատներում, այն էլ՝ բժշկի դեղատոմսով: Այս մասին հաղորդում է The Guardian-ը:
Օրենսդրական ակտը խորհրդարան է ներկայացրել Իսլանդիայի առողջապահության նախկին նախարար Սիվ Ֆրիդլեյֆսդոթիրը: Նա պնդում է, որ իր նախաձեռնությանն աջակցություն են հայտնել երկրի խորհրդարանի 5 ֆրակցիաներ:
Ըստ այդ փաստաթղթի, առաջարկվում է ընդհանրապես արգելել ծխախոտի վաճառքը խանութներում, ռեստորաններում, կրպակներում: Ընդ որում՝ բժիշկը ծխախոտ գնելու դեղատոմս կարող է տալ միայն այն դեպքում, երբ ծխելու դեմ բուժումը ոչ մի արդյունք չի տվել:
Իսլանդիայի կառավարության ներկայացուցիչն ասել է, որ օրինագիծն, անշուշտ, շատ լուրջ է, սակայն տարակուսանք է հայտնել, թե այն կընդունվի՝ չհայտնելով իր թերահավատության պատճառները: