«Առաջին լրատվական»-ի զրուցակիցն է ռուսաստանաբնակ գործարար Լևոն Մարկոսը։
– Պարոն Մարկոս, Հայաստանում տեղի ունեցած հեղափոխությունը ի՞նչպես եք գնահատում։ Ե՞րբ եք պատրաստվում Հայաստանում ներդրումներ անել և Հայաստանում ներդրումների համար դաշտն ինչպե՞ս եք գնահատում։
– Հեղափոխությունը եղավ, քանի որ ժողովրդի համբերության բաժակը լցվել էր: Նախկին իշխանությունները մի պարզ ճշմարտություն հաշվի չէին առել, որ ամեն ինչ ժամանակավոր է, և ինչ ցանես, այն էլ կհնձես: Ներդրումների համար դաշտը գնահատում եմ շատ նպաստավոր։ Շատ մոտ ժամանակներում ներդրումներ անող մեր հայկական խումբը կլինի Հայաստանում։ Ես ավելի շուտ կժամանեմ Հայաստան, տեղում կքննարկենք, թե ինչ է մտածում կառավարությունն այդ ներդրումների մասին, որից հետո կվերադառնամ, և արդեն միասին ներդրողների խմբով կայցելենք Հայաստան։ Մենք արդեն այստեղ հանդիպումների շարք ենք սկսել ներդրողների հետ։ Մենք այդ փակ խմբով կգանք, իսկ ավելի ուշ՝ երկրորդ խումբը կլինի, արդեն Ռուսաստանի գործարարներով։ Երրորդ փուլում արդեն երրորդ երկրների գործարարները պետք է գան Հայաստան, և մենք արդեն կապ ենք հաստատել արտասահմանյան գործարարների հետ, որոնք նոր տեխնոլոգիաներ կբերեն Հայաստան։ Կարող են օգտագործել Հայաստանում եղած գիտահետազոտական կենտրոնները, հագեցնել դրանք նոր տեխնոլոգիաներով։
-Ի՞նչն էր պատճառը, որ դեռ չէիք շտապում ներդրումներ անել այս ամիսների ընթացքում։
– Ինչպես գիտեք, ես նախորդ իշխանությունների օրոք և շնորհիվ լուրջ վնասներ եմ կրել և շարունակում եմ կրել: Այսօր էլ քրեական գործ է ընթանում, որը նախորդ իշխանություններն էին արհեստականորեն սարքել, որպեսզի իմ մուտքը Հայաստան սահմանափակեն: Այդ քրեական գործը դեռևս կարճված չէ: Զուգահեռ քննվում է բարձրաստիճան պաշտոնատար անձանց կողմից իմ գույքերի խլելու գործընթացին մասնակցելու դրվագները: Գոնե իմ մերձավորների և թիմի համար կարևոր է հստակեցում թալանված ներդրողների պաշտպանության հարցում: Չնայած դրան, ես տեսնում եմ առաջընթաց քրեական գործով: Տեսնում եմ Հատուկ քննչական ծառայության կողմից ճշմարտությունը բացահայտելու ցանկությունը, իսկ դա, հավատացեք, քիչ բան չէ:
Ինչպես արդեն նշել եմ, ներդրումներ կատարելուն ուղղված կազմակերպչական գործողություններ անում եմ: Ներդրողներին նաև կարող է ինչ-որ չափով անհանգստացել դեռևս նախորդ իշխանությունների ժամանակ ծաղկած օլիգարխների և չինովնիկների ներկա լկտիությունը և ժողովրդի դեմ սանձազերծված քայլերը: Նիկոլ Փաշինյանի լիբերալ պահվածքը այս մարդկանց շփոթեցնում է, բայց ուսումնասիրելով Նիկոլ Փաշինյանի անցյալը և խառնվածքը՝ վստահ եմ, որ իրենք պատասխան են տալու և ժողովրդից թալանվածը վերադարձնելու են:
Մենք հիմա պետք է կանգնենք Փաշինյանի կողքին։ Մինչև հիմա մտածում էինք, որ դա միայն Հայաստանի կառավարության գործն է, մենք իրավունք չունենք միջամտել, բայց հիմա տեսնում ենք, թե ինչ է կատարվում, գնալու ենք ու մեր աջակցությունը հայտնենք վարչապետին։
– Մի քանի օր առաջ Գագիկ Ծառուկյանը հայտարարեց, որ մարդիկ, որոնք ուզում էին վերադառնալ, ներդրումներ անել, հիմա «տորմուզ» են տվել: Արդյոք կա՞ այդպիսի բան:
Գագիկ Ծառուկյանը լավ կանի իր խնդիրներով զբաղվի: Հիմա բոլորը ասպետ են ցույց տալիս իրենց, ժողովրդի ծոցից դուրս եկած բարերարներ՝ մոռանալով, որ մենք կարճ հիշողություն չունենք: Նույն Գագիկ Ծառուկյանն էլ է մասնակցել Մասիվի և Պրոսպեկտի շուկաներն ինձնից խլելու գործընթացին:
– Ո՞ր փուլում են ձեր դատական գործերը:
Ես դա չեմ կարող ասել, պետք է դատախազությունը, քննիչները ասեն։ Քննությունը ընթանում է, ես չեմ արագացնում՝ հասկանալով, որ ավելի կարևոր գործեր են քննվում։ Թող հիմա ավելի կարևոր հարցերը լուծեն։ Իսկ իմ գործի էությունը պարզ է, երկրի նախորդ ղեկավարները իմ օբյեկտները խլել են ու տվել են իրենց բարեկամներին կամ մերձավորներին։