Երեկ Վենեսուելայի նախագահ Ուգո չավեսը հայտնվել է տասնյակ հազար մարդկանց առաջ, որոնք եկել էին նախագահական նստավայրի մոտ՝ ողջունելու Կուբայից վերադարձած, սակայն դեռ չապաքինված նախագահ Ուգո Չավեսին: Նա դուրս է եկել պատշգամբ՝ երկրի ազգային դրոշը ձեռքին և հանդես եկել կարճատև ելույթով: Այս մասին հաղորդում է BBC News-ը:
Չավեսը ողջունել է բոլորին՝ նախ երգելով հավաքվածների հետ երկրի ազգային հիմնը: 30 րոպե տևած ելույթում նա ասել է, որ իր ճակատամարտը հիվանդության հետ դեռ չի ավարտվել, սակայն խոստացել է հավաքվածների օգնությամբ հաղթել «կենաց մահու այդ պատերազմում»: Նա շնորհակալություն է հայտնել հավաքվածներից՝ նշելով, որ հենց նրանց աջակցությունն է «ամենալավ դեղամիջոցը հիվանդությունների դեմ»: Այս մասին հաղորդում է Associated Press գործակալությունը:
Չավեսը հավաքվածներին նաև տեղեկացրել է, որ չի կարող մասնակցել Իսպանիայից ազատագրվելուն 200-ամյակին նվիրված տոնակատարություններին, որոնք տեղի են ունենալու հուլիսի 5-ին:
Հիշեցնենք, որ մոտ մեկ ամիս առաջ Ուգո Չավեսը ժամանել էր Կուբա, որտեղ, ինչպես հետագայում պարզ դարձավ, հեռացրել էին քաղցկեղածին ուռուցք: Նա ստիպված էր երեկ երկիր վերադառնալ, քանի որ խոսակցություններ ու հրապարակումներ էին ի հայտ եկել պաշտոնական լիազորություններին վերադառնալու անհնարինության մասին՝ կապված ծանր հիվանդության հետ, ինչը սպառնում էր ներքաղաքական լարվածություն մտցնել Վենեսուելայում: