Պետական վերահսկողության ծառայություն պետ Դավիթ Սանասարյանին որպես կասկածյալ ներգրավելու մասին լուրը դարձավ ներքաղաքական ամենակարևոր իրադարձություններից մեկը։ Ազգային անվտանգության ծառայությունը վարչապետին առաջարկել է՝ քննության շահերից ելնելով, ժամանակավորապես դադարեցնել Դավիթ Սանասարյանի լիազորությունները։ Վարչապետ Նիկոլ Փաշինյանը քննիչի կայացրած որոշումը՝ Դավիթ Սանասարյանի պաշտոնավարությունը ժամանակավորապես դադարեցնելը բավարարել է, սակայն նշել է, որ նա պաշտոնից չի զրկվի, քանի որ վարչապետը հարգում է անմեղության կանխավարկածը։
Փաստացի, առանց այն էլ հնչեղ գործը ստանում է էլ ավելի հնչեղություն՝ հաշվի առնելով այն հանգամանքը, որ այստեղ, դե ֆակտո, վարչապետին առընթեր երկու ուժային կառույցների բախում է։ Ինչպե՞ս կմեկնաբանեք այս իրավիճակը «Առաջին լրատվական»-ի հարցին քաղաքագետ Հայկ Մարտիրոսյանը պատասխանեց․ «Ես կարծում եմ, որ սա ներիշխանական վատ ինտրիգ է։ Անկեղծ ասած՝ Դավիթ Սանասարյանին ճանաչելով երկար տարիներ ի վեր, և ծանոթ լինելով նրա կերպարին, մեկ վայրկյան անգամ չեմ կասկածում, որ անմեղ է։ Կարծում եմ՝ անհեթեթություն է մեղադրել Սանասարյանին այն բանի համար, որում նրան մեղադրում են։ Անկեղծ ասած՝ մանրամասներին տեղյակ չեմ, թե ինչ հիմքերով է նման որոշում կայացվել, բայց ամեն դեպքում պետք է ասեմ, որ վստահաբար իշխանական համակարգում կան մարդիկ, որոնք կարող են տեսականորեն ներգրավված լինել տարբեր, եթե ոչ կոռուպցիոն, ապա կոռուպցիամերձ իրավիճակներում, և տարօրինակ է, որ բոլորի միջից ամենաուժեղ կերպարն է թիրախավորվում»։
«Հեղափոխությունը խժռում է նախ և առաջ իր լավագույն կադրերին։ Դավիթ Սանասարյանը «Մերժիր Սերժին» նախաձեռնության առաջնորդն էր, որը միավորվեց Փաշինյանի «Քայլ արա» շարժման հետ, և երբեք չի եղել քայլողներից ու այդ թիմում դիտարկվել է օտար։ Իմ վերլուծությունը և իմ պատկերացումները այն են, որ ամենաուժեղ կերպարը, որը նաև ամենաանկախ կերպարն էր և ամենասիրված կերպարներից մեկն էր այս իշխանությունում, պետք է որ խանգարեր շատերին։ Իհարկե, չգիտենք՝ ում մասին է խոսքը, բայց ամեն դեպքում վարչապետը շատ զգույշ պետք է լինի, որովհետև սա, նախ և առաջ, վերջիվերջո թիրախավորելու է իրեն»,- հավելեց քաղաքագետը։
Մանրամասները՝ տեսանյութում։