Երևանի «Արարատ» ֆուտբոլային ակումբը գլխավոր մարզիչ Աբրահամ Խաշմանյանին պաշտոնանկ անելուց հետո թիմի գլխավոր մենեջերի պաշտոնում նշանակեց Վալերի Հովհաննիսյանին: Վերջինս հայտնի է իր հարուստ գործունեությամբ, թե հայկական և թե ռուսական ֆուտբոլում: Այս պահին սակայն, խնդիրը ամենևին էլ Հովհաննիսյանի նշանակմանը չի վերաբերվում: Ընթացիկ մրցաշրջանում «Արարատի» ղեկավարությունը երկու անգամ հեռացրել է թիմի գլխավոր մարզիչներին:
«Ալաշկերտի» հետ վերջին հանդիպումը «Արարատն» անցկացրեց Տիգրան Եսայանի գլխավորությամբ: Երևանյան ակումբը 15 միավորով շարունակում է եզրափակել մրցաշարային աղյուսակը: «Արարատի» ղեկավարությունը շվեյցարահայ հայտնի գործարար Վարդան Սրմաքեշի գլխավորությամբ շարունակ լարված հարաբերությունների մեջ էր Հայաստանի ֆուտբոլի ֆեդերացիայի նախկին նախագահ Ռուբեն Հայրապետյանի հետ: Վերջին տարիներին թիմը շարունակ եղել է Բարձրագույն խմբի առաջնության ստորին հատվածում: Պակաս չեն եղել «Արարատի» շուրջ ծագած սկանդալները, որոնք սովորական երևույթ են դարձել: Ակումբի ղեկավարությունը շարունակ հայտարարում էր, որ իմաստ չունի ներդրումներ անելու, քանի դեռ Հայաստանի ֆուտբոլի ֆեդերացիան գլխավորում է Հայրապետյանը: Անցյալ տարի Հայրապետյանը հեռացավ Հայաստանի ֆուտբոլի ֆեդերացիայից և «Արարատի» ղեկավարությունը կարծես թե լավ հարաբերությունների մեջ է ՀՖՖ-ի նոր ղեկավարության հետ: Թիմում սակայն, ոչինչ չի փոխվել, որևէ առաջընթաց չի նկատվում: «Արարատն» այն ակումբն է, որը Հայաստանի մասշտաբով ունի երկրպագուների բանակ:
Մարդիկ շարունակ սպասում են, որ իրենց սիրելի «Արարատը» ոտքի կկանգնի բայց․․․: Վերջերս ակումբի «Maximus» ֆան-շարժումը Vnews.am-ի միջոցով հայտարարություն էր տարածել՝ պահանջելով Վարդան Սրմաքեշի և մյուս համասեփականատեր Հրաչ Կապրիելյանի հրաժարականը: «Արդեն երկար տարիներ է, ինչ Վարդան Սրմաքեշը և Հրաչ Կապրիելյանը հանդիսանում են «Արարատ» ֆուտբոլային ակումբի սեփականատերերը: Լինելով հաջողակ բիզնեսմեններ, կարծում էինք, որ կարող են հաջողություն բերել և ոտքի կանգնեցնել մեր լեգենդար «Արարատ» ակումբը: Սակայն, ի տխրություն բոլորիս, այս տարիների ընթացքում ներկայացնելով տարատեսակ պատճառներ (ի թիվս նշելով Հայրապետյան Ռուբենի մեղավորությունը) միշտ խուսափել են ընդունել այն քննադատությունները որոնք օբյեկտիվ են, խիստ և ճշմարիտ: Բայց բոլորիս հայտնի է, որ Հայաստանում այս վերջին մեկ տարվա ընթացքում այսպես ասած «իրավիճակ է փոխվել»: Ցավոք սրտի, երկրում տեղի ունեցած փոփոխությունները որևէ կերպ դրականորեն չեն անդրադարձել ակումբի վրա, ավելին՝ արձանագրվել են բացասական զարգացման միտումներ:Հասկանալով այս ամենի անդառնալի և կործանարար հետևանքները, մենք՝ «Արարատ» ֆուտբոլային ակումբի երկրպագուներս հայտարարում ենք. Չենք հանդուրժելու նման պիղծ և անբարո վերաբերմունքը: Դադարեք զբաղվել անհեթեթ և անտրամաբանական պատճառաբանություններ տալով: Պահանջում ենք Վարդան Սրմաքեշի և Հրաչ Կապրիելյանի հրաժարականը: Պահանջում ենք վաճառել ակումբը։ Տեղեկացնենք նաև, որ ակումբի բոլոր հանդիպումները բոյկոտվելու են, քանի դեռ մեր պահանջը չի կատարվել»,- նշված է հայտարարության մեջ։
Երկրպագուների դիտարկումները իսկապես տեղին են: Իսկապես դժվար է տրամաբանել Սրմաքեշի և Կապրելյանի նման մոտեցումը: Ի՞նչ իմաստ ունի նման կերպ ակումբ պահելը: Իսկապես ամոթ է: Որպես օրինակ ուզում ենք բերել մեր մյուս «Արարատի»՝ «Արարատ-Արմենիայի» ղեկավարության մոտեցումը: Հիշեցնենք, որ այս թիմը պատկանում է մեկ այլ հայ հայտնի գործարար ռուսաստանաբնակ Սամվել Կարապետյանին: Այս ակումբն առաջին անգամ է մասնակցում Հայաստանի բարձրագույն խմբի առաջնությանը և գլխավորում է մրցաշարային աղյուսակը: Մինչ այս «Արարատ-Արմենիան» Մոսկվայի «Արարատ» անվամբ մասնակցել էր Ռուսաստանի երկրորդ դիվիզիոնի առաջնությանը և հենց առաջին փորձից մեծ առավելության զբաղեցրել էր առաջին հորիզոնականը: Կարապետյանի «Արարատ-Արմենիայում» պրոֆեսիոնալ մթնոլորտ է և կան բոլոր նախադրյալները առաջին փորձից նաև Հայաստանի չեմպիոն դառնալու: Առաջնության սկզբնամասում խնդիրներ ունեցավ նաև «Արարատ-Արմենիան», բայց ակումբի ղեկավարությունը արագ կարգավորեց դրանք:
Արդեն իսկ կարելի է ասել, որ ֆուտբոլային հարթության վրա Սամվել Կարապետյանն ուղղակի մանկական մատ է արել Սրմաքեշին: Ասել, որ Սրմաքեշը ռեսուրսներ չունի «Արարատը» ոտքի կանգնեցնելու ուղղակի ծիծաղելի կլինի: Նա հովանավորում է բազմաթիվ ֆուտբոլային ակումբներ: Օրեր առաջ էլ Սրմաքեշը դարձել էր ֆրանսիական «Մարտիգ» ակումբի գլխավոր հովանավոր: Ներկայիս վիճակն իսկապես ցավալի է: Որքան կարելի է խաղալ հայկական ամենատիտղոսակիր ակումբի հետ: Բոլորը հոգնել են: Արդեն երկրպագուներն էլ են երես թեքել իրենց սիրելի թիմից: Ցավալի է նաև, որ իրավիճակի փոփոխության որևէ հեռանկար տեսանելի չէ:
