Հայաստանի խորհրդարանում ցեմենտային կրքերի բորբոքումն իրականում առերևույթ էր քաղաքական ուժերի բախում կամ հակադրություն՝ ԲՀԿ-«Իմ քայլը» ձևաչափով: Իրականում խորհրդարանում տեղի ունեցողը, իհարկե, արտախորհրդարանական ավելի լայն իրադարձությունները ներառյալ, բիզնեսի և քաղաքականության բախումն էր: Ավելի շուտ, բիզնեսի և քաղաքականության հայաստանյան սերտաճածության առերեսումը քաղաքական նոր իրողությունների և տրամաբանության անհրաժեշտության հետ: Ցեմենտի հարցը գուցե մի օր կլուծվի, մինչդեռ գլխավոր հարցն այն է, թե երբ կլուծվի բիզնեսի և քաղաքականության սկզբունքային, ինստիտուցիոնալ տարանջատման հարցը:
Թավշյա հեղափոխությունից հետո մենք անկասկած ունենք բոլորովին այլ պատկեր, հենց թեկուզ խորհրդարանում, որտեղ ներկայացված երկու ուժ՝ «Իմ քայլը» մեծամասնությունն ու «Լուսավոր Հայաստանը» գործնականում տարանջատված են բիզնեսից: Սակայն անկասկած է, որ այս պատկերն առավելապես երկու ուժերի մոտեցումների, պատկերացումների, սկզբունքների և արժեքների և քաղաքական կամքի դրսևորման արդյունք է, մինչդեռ, նույն կերպ խորհրդարանում ներկայացված է ուժ, որտեղ գերակշռում է լրիվ հակառակ տրամաբանություն ու մոտեցում, ինչը և դրսևորվում էր ցեմենտային քննարկումների ժամանակ:
Ընդ որում, այստեղ խնդիրն այն է, որ մտածողության և արժեհամակարգային հիմքի տեսանկյունից այդ վարքագիծը միանգամայն բնական է: Խնդիրն էլ հենց այն է, որ պետք է հստակեցնել միջավայրերը, և բիզնեսը պետք է գործի բիզնես միջավայրում, քաղաքականությունը՝ քաղաքական, տվյալ դեպքում խորհրդարանում: Երբ տեղի է ունենում միջավայրային խեղում, ծագում են համակարգային խորքային խնդիրներ: Ըստ այդմ, ամբողջ հարցն այն է, որ անհրաժեշտ են ինստիտուցիոնալ միջավայրային կարգավորումներ, որոնք բիզնեսին կդնեն և կպահեն իր միջավայրում՝ օրենսդրական պաշտպանության բավարար երաշխիքներով, իսկ խորհրդարանն էլ կթողնեն քաղաքականությանը՝ օրենսդրական լուծումների առավել խորքային, համակարգային ներուժով և արդյունավետությամբ:
Հայաստանում ոչ միայն տնտեսական, այլ նաև քաղաքական ռեֆորմացիայի ժամանակն է, առավել ևս, երբ քաղաքական ուժերի հարաբերակցությունը բխում է այդ ռեֆորմացիայի խորքային անհրաժեշտության շահերից, այսինքն՝ առավելագույնս հարմար է քաղաքական ռեֆորմացիայի և արդիականացման տանող օրակարգը սպասարկելու համար:
Լուսանկարը՝ Armeniasputnik-ի