Ազգային անվտանգության ծառայությունը, ինչպես գիտեք, հայտարարել է պետական վերահսկողական ծառայության ղեկավար Դավիթ Սանասարյանին մեղադրանք առաջադրելու մասին, իսկ վարչապետին առաջարկվել է, քննության շահերից ելնելով, ժամանակավորապես դադարեցնել Դավիթ Սանասարյանի լիազորությունները: Մեղադրանքն առաջադրվել է մի քանի շաբաթ առաջ հարուցված հայտնի քրգործի շրջանակում, երբ մեղադրվել և ձերբակալվել էին ՊՎԾ երկու այլ աշխատակիցներ՝ պաշտոնական դիրքի չարաշահման մեղադրանքով: Նկատենք, որ սկանդալային գործը հակադիր վիճակում է դրել վարչապետին առընթեր երկու դե ֆակտո ուժային կառույցներ՝ ԱԱԾ և ՊՎԾ:
Թեմայի շուրջ «Առաջին լրատվական»-ի հետ քննարկմանը մասնակցեցին ԳԽ նախկին պատգամավոր Ազատ Արշակյանը, քաղաքագետ Դավիթ Հովհաննիսյանը և «Իմ քայլը» խմբակցության պատգամավոր Գևորգ Պապոյանը:
«Մենք այս գործընթացին բուռն չենք արձագանքում, որովհետև մեզ համար գերակա է ՀՀ պետական շահը, և եթե որևէ անձ կատարել է իրավախախտում, ապա նա պետք է օրենքի խստությամբ պատասխան տա, իսկ եթե չի կատարել, արդար դատաքննությամբ պետք է ապացուցվի նրա արդարությունը»,- նշեց Գևորգ Պապոյանը՝ հավելելով, որ խնդիրը ոչ թե անձերի հետ է կապված, այլ երևույթի: «Ես, իհարկե, կուզենամ, որ խնդիրներ չլինեն, բայց եթե կան, ավելի լավ է բացահայտվեն, մեղավորները պատժվեն, քան թե հովանավորչություն լինի, և վերևից հրահանգով այդ գործերը փակվեն, այդ գործելաոճը Հայաստանում այլևս չկա»,- հավելեց «Իմ քայլը» խմբակցության պատգամավորը:
Ա. Արշակյանի դիտարկմամբ՝ իրավապահ մարմինների մրցակցությունը առողջ երևույթ է, և նրանց գործն է աչալուրջ լինել: ԳԽ նախկին պատգամավորը կարևորեց. «Մեզ մոտ արդարադատության առաջ բոլորը հավասար են, չկա խտրականություն: Կասկածամիտ իրավապահների շնչառությունը բոլորս պետք է մեր թիկունքում զգանք և աչալուրջ լինենք»:
Անդրադառնալով դիտարկմանը, որ գործ ունենք մի իրադարձության հետ, որն առանց քաղաքական աղմուկի չի կարող առաջնորդվել, Դ. Հովհաննիսյանը նկատեց. «Մեր ուժային կառույցները՝ այդ թվում նաև ԱԱԾ-ն, իշխանափոխությունից հետո չեն փոխվել, և նույնիսկ նրանք, ովքեր սուտ ցուցմունք էին տալիս, շարունակում են աշխատել ոստիկանությունում, ամեն ինչ մնացել է նույնը… Եթե դիտարկենք Դավիթ Սանասարյանի քաղաքական հետագիծը՝ նրա դիրքորոշումները, պայքարի գիծը և այսօրվա ուժայիններին, այդտեղ կա ռեալ խնդիր, և այդ խնդիրը ինչ-որ մի կետում պետք է բացվեր»: Ինչ վերաբերում է Դ. Սանասարյանին առաջադրված մեղադրանքին, քաղաքագետը նշեց, որ ԱԱԾ-ի պրոֆեսիոնալիզմի մասին մեծ կարծիք չունի:
Անդրադառնալով հարցին, թե արդյոք այս իրադարձությունը վարկանիշի կորուստ է իշխանության համար, Ա. Արշակյանը նշեց, որ հակառակը՝ վարկանիշի բարձրացում է. «Արդյո՞ք իշխանությունը հանուն իր վարկանիշի բարձրացման կգնար իր յուրայիններից մեկի «զոհաբերությանը», արդյո՞ք Դավիթ Սանասարյանը «զոհ» է: Եթե դա «զոհաբերություն» է, ապա իշխանությունը ինքնաքայքայման է գնում, բայց, իմ կարծիքով, անհնար է, որ Նիկոլ Փաշինյանը որոշեր կեղծ մեղադրանքով «զոհաբերել» Դավիթ Սանասարյանին»:
Գ. Պապոյանը հավելեց, որ ով մեղավոր է՝ կպատժվի, ով մեղավոր չէ՝ չի պատժվի, և ընդգծեց, որ հարցը վարչապետի մակարդակով չի լուծվելու, այլ լուծվելու է իրավական դաշտում:
Մանրամասն՝ տեսանյութում: