Դեռ 2015 թվականին, ծնելիության միջին գործակցի վրա հղում անելով, աշխարհի տարբեր երկրների դեմոգրաֆիկ հետազոտություններն անելիս ՄԱԿ-ը կանխատեսել է, որ Հայաստանի բնակչությունը մինչև 2100թ. ևս 41 տոկոսով նվազելու է: Ներկայումս մեր երկրում առկա քաղաքական, սոցիալ-տնտեսական իրավիճակը որքանո՞վ է այս պահին ազդում միգրացիոն գործընթացների վրա: Ժողովրդագրական խնդիրների և պետության կողմից իրականացվող միգրացիոն քաղաքականության շուրջ «Առաջին լրատվական»-ի հետ քննարկմանը այս և մի շարք հարցերի անդրադարձան «Ազգային օրակարգ» կուսակցության հիմնադիր անդամ Վարդան Մարաշլյանը և «Կովկաս» ինստիտուտի գիտաշխատող, քաղաքագետ Հրանտ Միքայելյանը:
Հ. Միքայելյանը նշեց, որ առկա է կարճաժամկետ դրական ազդեցություն, անցած տարվա կեսից սկսած՝ դրական սալդո է արձանագրվել, և դեռևս այս միտումը պահպանվում է:
Վ. Մարաշլյանը նկատեց, որ շատ երկրներում առկա են արտագաղթի մեծ տեմպեր և ցածր ծնելիություն, բայց Հայաստանը գտնվում է շատ ավելի բարդ իրավիճակում: «Մեզ համար դեմոգրաֆիական և միգրացիոն հարցերն ունեն լուրջ հետևանքներ առնվազն երեք ուղղությամբ՝ ազգային անտանգության, տնտեսական զարգացման տեսանկյունից և երրորդ՝ Հայաստանը հայության կենտրոնն է, բայց այստեղ ապրում է մեր ազգի ընդամենը 30 տոկոսը, և այս՝ 30/70 հարաբերակցությունը լուրջ խնդիր է. Սփյուռքը այս վիճակում պահել և զարգացնելը հնարավոր չէ: Պետք է աշխատենք մի քանի ուղղություններով. առաջինը՝ նվազեցնել արտագաղթի տեմպերը, ինչը հնարավոր է բարձր տնտեսական աճի պայմաններում, երկրորդ՝ խթանել հարենադարձությունը, փաստացի մինչ օրս հայրենադարձութան նոր հայեցակարգ և օրենք չկա, և երրորդ՝ ակտիվ միգրացիոն քաղաքականություն վարել»:
Հ. Միքայելյանի կարծիքով՝ հայրենադարձության ծրագրի կազմակերպման համար նախ պետք է իրականացնել նպատակաուղղված ուսումնասիրություն:
Վարչապետ Նիկոլ Փաշինյանի գլխավորությամբ վերջերս կառավարությունում տեղի է ունեցել ժողովրդագրական իրավիճակին նվիրված խորհրդակցություն, և քննարկման արդյունքում վարչապետը հանձնարարել է ձևավորել ժողովրդագրական իրավիճակի բարելավման խորհուրդ: Անդրադառնալով այս դիտարկմանը՝ Վ. Մարաշլյանը նշեց՝ ողջունելի է, որ կառավարությունը կարևորություն է տալիս այս խնդրին, բայց դեռևս տեսլական չկա. «Հեղափոխությունից անցել է մեկ տարի, ունենք հայրենադարձության համար լավ հնարավորությունների պատուհան, բայց դեռևս այս հարցը կարգավորված չէ»: Մարաշլյանի կարծիքով՝ պետք է ստեղծել կառույց՝ նախընտրելի է նախարարություն, որը կզբաղվի ինտեգրացիայի և հարենադարձության խնդիրներով:
Մանրամասն՝ տեսանյութում:
