«Կոռուպցիա կա, որի դեմ պետք է պայքարել, դրա մասին մենք միշտ խոսել ենք»,- այսօր խորհրդարանում լրագրողներին ասաց Լուսավոր Հայաստան խմբակցության ղեկավար Էդմոն Մարուքյանը:
Անդրադառնալով Պետական վերահսկողական ծառայության ղեկավար Դավիթ Սանասարյանին առաջադրված մեղադրանքին՝ Մարուքյանն ասաց, որ ճանաչում է նրան՝ որպես բարեվարքության բոլոր կաննոերը պահպանող մարդ: «Սա մեզ համար նույնպես անակնկալ է, ես կարծում եմ՝ պետք է թողնել նախաքննությունն ընթանա, թափանցիկ բոլորս կտեսնենք: Ինձ համար զարմանալին այն է, որ բոլորը քննադատում են ԱԱԾ պետին, Ֆեյսբուքում այդպիսի քարոզարշավ կա: Զարմանալի է, որովհետև Հայաստանում ԱԱԾ-ն կառավարողը վարչապետն է, այսինքն՝ այնտեղ երկերեսանիության հարց կա, որ սխալ տեղ են ուղղում պահանջները»,- ասաց Մարուքյանը: Նա նշեց, որ չի ուզում հավատալ, որ որևէ մեկի նկատմամբ քաղաքական հետապնդում կլինի, հնարավոր է փնթիություն լինի, բայց ոչ քաղաքական հետապնդում: «Եթե նման բան լինի, մենք կբարձրաձայնենք»,- ասաց նա: