Ռուսական ընկերությունը միջնորդ է դառնում PDVSA-ի և վենեսուելական նավթի վերջնական գնորդի միջև, հաղորդում է Reuters-ը:
Վենեսուելայի նախագահ Նիկոլաս Մադուրոյի կառավարությունն օգտվում է ռուսաստանյան «Ռոսնեվթ» կորպորացիայի ծառայություններից՝ երկրի նավթային արդյունաբերության նկատմամբ ԱՄՆ պատժամիջոցները շրջանցելու համար: Այս մասին ապրիլի 18-ին հաղորդել է Reuters-ը:
Նշվում է, որ Վենեսուելայի պետական սեփականություն հանդիսացող PDVSA նավթային ընկերությունը վառելիքի վաճառքի իր հաշիվ-ապրանքագրերը փոխանցում է «Ռոսնեվթին»:
Գործակալության տվյալներով, ռուսական ընկերությունը հանդես է գալիս որպես PDVSA գործարքների միջնորդ. վենեսուելական նավթի համար վճարում է զեղչով, իսկ հետագայում ամբողջ արժեքը ստանում վերջնական գնորդից:
Ընդգծվում է, որ բոլոր գործարքներն իրականացվում են անմիջապես և միջոցները հայտնվում են ռուսական բանկերում կամ օգտագործվում են հաշվարկներ կատարելու համար՝ վճարումների ակնկալիքով, որպեսզի նավթի արտահանումը չընդհատվի:
Ինչպես նշում է Reuters-ը, PDVSA-ի «Ռոսնեվթի» հետ վճարային համաձայնագիրը հանդիսանում է Մադուրոյի կառավարության մի շարք սխեմաների մասը՝ ուղղված կանխիկ միջոցների ձեռքբերմանը, այդ թվում կենտրոնական բանկի ոսկու պահուստների վաճառքը:
ԱՄՆ-ը PDVSA-ի նկատմամբ պատժամիջոցներ է մտցրել այս տարվա հունվարին:
