ԱՄՆ-ի արդարադատության նախարարությունը Կոնգրեսին է ներկայացրել հատուկ դատախազ Ռոբերտ Մյուլերի՝ 400 էջից կազմված զեկույցը:
BBC-ի ռուսական ծառայության փոխանցմամբ՝ գլխավոր դատախազ Ուիլիամ Բարը զեկույցի վերաբերյալ մամուլի ասուլիսի ժամանակ հայտարարել է, որ ԱՄՆ նախագահ Դոնալդ Թրամփը և նրա խմբի որևէ անդամ համաձայնություն չի ունեցել Կրեմլի հետ 2016թ.-ի ԱՄՆ-ի նախագահական ընտրությունների ժամանակ: Այս հարցի հետաքննությունը շարունակվում էր 2 տարի:
Միևնույն ժամանակ Ռոբերտ Մյուլերը հայտարարել է, որ Ռուսաստանը փորձել է միջամտել 2016թ.-ի ԱՄՆ նախագահական ընտրություններին:
Ուիլիամ Բարը նաև հայտարարել է, որ Թրամփը չի խոչընդոտել արդարադատությանը: Մյուլերն իր զեկուցում դժվարանում էր այդ հարցի շուրջ վերջնական եզրակացություն տալ:
Բարը նաև հայտնել է, որ հատուկ դատախազը գրանցել է Թրամփի կողմից արդարադատությանը խոչընդոտելու 10 դեպք, սակայն այդպես էլ մեղադրանք չի ներկայացրել: Բարը խոստովանել է, որ իր և Մյուլերի պատկերացումները տարբեր են այն մասին, թե ինչ է նշանակում արդարադատությանը խոչընդոտել:
Թրամփի փաստաբաններն այդ զեկույցի հրապարակումն անվանել են լիակատար հաղթանակ նախագահի համար: