Ազգային ժողովում առաջին ընթերցմամբ քվեարկության դրված «Կառավարության կառուցվածքի և գործունեության մասին» օրենքում փոփոխություններ և լրացումներ կատարելու մասին օրենքի նախագծին կողմ է քվեարկել «Իմ քայլը» խմբակցությունը, իսկ «Լուսավոր Հայաստանը» և «Բարգավաճ Հայաստանը»՝ դեմ: Նախագծին կողմ է քվեարկել 71, դեմ՝ 40 պատգամավոր:
Նկատենք, որ խորհրդարանական քննարկումների թեժ ֆոնին էլ զարգանում էին իրադարձությունները «ԱրարատՑեմենտ» գործարանի շուրջ, որի սեփականատեր Գագիկ Ծառուկյանն այցելել է կրճատումների մտադրության դեմ բողոքող աշխատողներին և հայտարարել, որ կրճատումներ չեն լինելու: Հատկանշական է այն, որ բողոքող քաղաքացիները հայտարարել էին, թե իրենք դուրս չեն գա վարչապետ Փաշինյանի դեմ, նրանց խնդիրը գործարանի սեփականատերերի հետ է: Սեփականատերն էլ նախօրեին խորհրդարանում հայտարարել էր, որ ԱԺ-ի տնտեսական հանձնաժողովն է պատճառը, որ ցեմենտ արտադրելը դառնում է ոչ շահավետ, և այդ դեպքում պատասխանատվությունն իր վրա չէ:
Թեմայի շուրջ «Առաջին լրատվական»-ի հետ քննարկմանը մասնակցեցին վերլուծաբան Հակոբ Բադալյանը և տեղեկատվական անվտանգության փորձագետ Սամվել Մարտիրոսյանը:
Այսպիսով՝ ընդդիմությունը չընդունեց խորհրդարանական մեծամասնության առաջարկած փոփոխությունը՝ կառավարության կառուցվածքի նախագիծը: Հակոբ Բադալյանի դիտարկմամբ՝ բնական է, որ ընդդիմությունը չէր ընդունելու և պետք է օգտագործեր այս պահը. «Սա ընդդիմության համար բավականին լավ փաթեթ էր վարչապետին ընդդիմախոսելու համար: Սկզբունքորեն այնպես չէ, որ ընդդիմությունը շատ ավելի հիմնավոր բացատություններ էր ներկայացնում: Պետք է ստրատեգիական օրակարգ ձևավորվի, բայց դա կարճ ժամանակահատվածի խնդիր չէ:
Խորհրդարանական մեծամասնությունը պատասխանատվություն վերցրեց այդ քայլի համար, այդպիսի ոչ պոպուլյար և հասարկության որոշակի շերտերի դժգոհությունն առաջացնող քայլերի կարող են գնալ շատ մեծ վստահություն ունեցող մեծամասնությունները: Ակնհայտ է, որ սա մարտավարական քայլ է»:
Սամվել Մարտիրոսյանի խոսքով՝ կառավարությունը «ցավոտ» որոշում է կայացրել. «Բայց այդ «ծանր» որոշումները հանուն ինչ-որ բանի պետք է լինեն, պետք է հասկանանք՝ ուր ենք գնում, մինչդեռ դա անհասկանալի է: Բոլոր ուղղություններն էլ կարևոր են, բայց պետք է որոշել՝ որոնք են առավել կարևորագույն ուղղությունները, որ պետք է զարգացնենք»,- նշեց տեղեկատվական անվտանգության փորձագետը՝ հավելելով նաև, որ օպտիմալացումը վատ բան չէ, բայց սխալ հաշվարկի դեպքում կարող է նաև վատ հետևանքներ ունենալ:
Ս. Մարտիրոսյանի կարծիքով՝ քանի որ ներքաղաքական լարվածություն կա հին և նոր իշխանությունների միջև, և անվտանգության խնդիր կա երկրում, այս պահին բարդ է ԱԱԾ-ն և ոստիկանությունը, որպես նախարարություն, կառավարության կազմում ներառելը. «Ինչ վեաբերում է ռազմավարությանը, ապա ես կգերադասեի, որ ԱԱԾ-ն բաժանվեր մասերի: Քիչ երկրներում է, որ այդքան ծառայություններ ներառված են նույն կառույցում: Օրինակ՝ ԱՄՆ-ում, Ռուսաստանում այդ կառույցներն առանձին են գործում: Եթե բոլոր լծակները մի կառույցի ձեռքում են, դա լավ չէ և բնորոշ չէ դեմոկրատական երկրին: Այժմ այդ խնդրին անդրադառնալը ժամանակավերպ է, բայց ապագայում պետք է դրան գնալ»:
Անդրադառնալով «ԱրարատՑեմենտի» շուրջ կատարվող իրադարձություններին՝ Ս. Մարտիրոսյանը կարծիք հայտնեց, որ փորձ է արվել քաղաքականության մեջ մտցնել տնտեսական թեմա. «Դա վտանգավոր միտում է, և եթե դառնա լիարժեք գործիք, կարող են տնտեսության «հերն անիծել»: Հայստանում սաբոտաժ իրականացնելն այդքան էլ բարդ չէ… »:
Հ. Բադալյանը հավելեց, որ բուն խնդիրը բիզնեսի և քաղաքականության սերտաճումն է, որի մարմնացում է դարձել ԲՀԿ-ն: «Գ. Ծառուկյանի գործունեությունը քաղաքականության մեջ պարբերաբար այսպիսի իրավիճակների է հանգեցնելու: Խոշոր սեփականատեր, գործարանատեր լինելով՝ նաև քաղաքական կուսակցության առաջնորդ լինելն առաջացնում է քաղաքականության զարգացման խոչընդոտներ»:
Մանրամասն՝ տեսանյութում: