Այսօր՝ ապրիլի 18-ին, Ազգային ժողովում շարունակվում են աշխատանքները: Այժմ շարունակում է քննարկվել Կառավարության կառուցվածքի և գործունեության մասին օրենքում փոփոխություններ և լրացումներ կատարելու մասին հարցը:
«Իմ քայլը» խմբակցության պատգամավոր Վահագն Հովակիմյանը իր եզրափակիչ ելույթում հայտարարեց, որ հարցուպատասխանին ոստիկանապետի և ԱԱԾ-ի պետի ներկայությունը շատ հեշտ լուծելի խնդիր է. «Ընդամենը օրենսդրական կարգավորման խնդիր ունի: Պետք չէ մեծ անլուծելի խնդիր դարձնել»:
Անդրադառնալով «Լուսավոր Հայաստան» խմբակցության ղեկավար Էդմոն Մարուքյանի երեկվա ելույթին՝ պատգամավորն ասաց. «Ես իհարկե հավատում եմ, որ Մարուքյանը կարող է տիրապետել Սերժ Սարգսյանի կոստյումի ոչ միայն կոճակներին, այլև մանրաթելերին, բայց մենք միշտ կրել և կրելու ենք մեր կոստյումը»:
Նկատի ունենալով ԲՀԿ խմբակցությունը՝ նա նշեց՝ միևնույն խմբակցության միևնույն պատգամավորի կողմից անընդհատ փորձ է արվում երիտասարդ պաշտոնյաներին մեղադրել ոչ կոմպոտենտության մեջ. «Սակայն պետք է հիշել, որ այդ խմբակցության պատգամավորը, 16 տարի լինելով պատգամավոր, առաջին անգամ այս տարվա հունվարին է ելույթ ունեցել»:
Վահագն Հովակիմյանը ընդդիմությանը կոչ արեց տեսնել սեփական աչքի գերանները՝ ուրիշի աչքի փուշը տեսնելուց առաջ. «Մի անտեսեք ձեր աչքի գերանները, առերեսվեք ձեր աչքի գերանների հետ»:
Մանրամասները՝ տեսանյութում: