Այսօր՝ ապրիլի 17-ին, ԱԺ-Կառավարություն հարցուպատասխանի ժամանակ «Բարգավաճ Հայաստան» խմբակցության պատգամավոր Շաքե Իսայանը նշեց, որ «Լուսավոր Հայաստան» խմբակցության պատգամավոր Գևորգ Գորգիսյանը մասամբ հղել է իր հարցը այն մասին, որ վարչապետի լիազորությունների մասին խոսելիս Նիկոլ Փաշինյանը ընտրվելուց առաջ՝ 2018 թվականի մայիսի 1-ին, ասել է, որ դրանք չափից շատ են, և որ ժողովրդավարությունը պետք է ինստիտուցիոնալիզացնել, որպեսզի որևէ մեկն իր իշխանությունը ի չարս չօգտագործի։
Իսայանն ասաց, որ այսօր կառավարության կառուցվածքի քննարկումների ժամանակ իշխանական պատգամավորների որոշ ելույթներ հակասել են ժողովրդավարական սկզբունքներին. «Ես հիշեցի, որ դուք ասել եք, որ միտված եք ինստիտուտների կայացմանը: Ասել եք նաև, որ վարչապետի ձեռքում չափից ավելի լիազորություններ են կենտրոնացված»: Իսայանը հետաքրքվեց՝ ի՞նչ կարծիք ունի այս ամենի մասին վարչապետ Նիկոլ Փաշինյանը այսօր՝ մեկ տարի անց։
Հարցին պատասխանելիս Նիկոլ Փաշինյանն ասաց, որ եթե խոսքը ԱԱԾ-ի և ոստիկանության մասին է, ապա դրանք ժամանակին եղել են նախարարություններ, և այդ ժամանակ դրանց հետ կապված խնդիրները պակաս չեն եղել։ Փաշինյանը հարցրեց. «Ուզո՞ւմ ենք, որ ԱԱԾ-ն և Ոստիկանությունը լինեն քաղաքական պրոցեսի մասնակիցներ, ուզո՞ւմ ենք, որ քաղաքական գործիչը լինի ԱԱԾ ղեկավար: Եթե որոշենք, որ ուզում ենք՝ խնդիր չկա»։
Փաշինյանը հակառակ կողմից էլ մոտեցավ հարցին․ երբ ասում են, որ այդ կառույցները պետք է խորհրդարանական վերահսկողության դաշտ տեղափոխվեն, արդյո՞ք խորհրդարանն այսօր լիարժեք օգտվում է իր վերահսկողական գործառույթից։
«Օրինակ` իմ տրամաբանությամբ հիմա Հայաստանի Ազգային ժողովում գոնե մի 5-6 հատ քննիչ հանձնաժողով պիտի ստեղծված լիներ տարբեր հարցերով։ Ինչի՞ չի ստեղծվում։ Ես չե՞մ թողնում, որ ստեղծվի։ Նկատի ունեմ՝ այդ լիազորությունները պետք է նաև կիրառող լինի»,- ասաց նա:
Մանրամասները՝ տեսանյութում:
