Այսօր Կարեն Դեմիրճյանի ծննդյան օրն է. 20-րդ դարում Հայաստանի, թերևս, ամենանշանավոր քաղաքական և պետական գործիչներից մեկն այսօր կդառնար 87 տարեկան: «Կարեն Դեմիրճյանի նման մարդիկ 100 տարին մեկ են ծնվում, իր անցած ճանապարհով, իր հիշատակով, ստեղծած կոթողներով նա եզակի մարդ էր, ով սիրում էր ժողովրդին, և որին սիրում էր ժողովուրդը: Կարեն Դեմիրճյանը 14 տարի երկիրը ղեկավարել է և արժանիորեն վաստակել Կարեն Շինարար անունը»,- «Առաջին լրատվական»-ի հետ զրույցում այս մասին ասաց Կարեն Դեմիրճյանի կուսակից ընկեր, ՀԺԿ փոխնախագահ Գրիգոր Հարությունյանը՝ հավելելով, որ, լինելով իր ժողովրդի արժանի զավակը, Դեմիրճյանը 98թ. վերադարձավ քաղաքականություն, և ժողովուրդը գիտի՝ ընտրություններն ինչպես կեղծեցին և ինչպես թույլ չտվեցին, որ նա իր պարտքը կատարի իր ժողովրդի առջև:
Անդրադառնալով դիտարկմանը, որ վերջին շրջանում ակտիվացել են Հոկտեմբերի 27-ի հետ կապված խոսակցությունները, Գ. Հարությունյանը նշեց. «Մենք միշտ ասել ենք, որ Ռ. Քոչարյանի և Ս. Սարգսյանի իշխանության տարիներին բացառվում էր, որ Հոկտեմբերի 27-ը բացահայտվեր: Քոչարյանն ամբողջ կյանքում մնացել է «ուչաստկովիի» մակարդակում: Նա 20 տարի ստրկացրել է մեր ազգին, որի պատճառով մեր երկրից միլիոնից ավելի մարդ է հեռացել… Քոչարյանը գտնվում է այնտեղ, որտեղ վաղուց պետք է լիներ:
Առանց Հոկտեմբերի 27-ի բացահայտման մեր երկիրն ապագա չունի: Հոկտեմբերի 27-ի դեպքերը հետագայում բերեցին 2004թ. ապրիլի, 2008-ի Մարտի 1-ի: Նոր իշխանությունը պարտավոր է բացահայտել Հոկտեմբերի 27-ը, և հույս ունենք, որ կանեն»,- նշեց Գ. Հարությունյանը՝ ընդգծելով նաև, որ հանգամանքներ շատ կան, նոր հանագամանքի ի հայտ գալու կարիք չկա, և որ Հոկտեմբերի 27-ին հաստատ ձայնագրություններ են արվել»:
Մանրամասն՝ տեսանյութում:
