«Հումանիտար նախաձեռնությունները, իհարկե, կթեթևացնեն մի քանի տասնյակ մարդկանց ճակատագրերը՝ նկատի ունեմ նրանց, ովքեր հնարավորություն կստանան իրենց հարազատների հետ շփվել։Բայց սկզբունքորեն այդ հումանիտար նախաձեռնությունները աշխատում են այն սկզբունքների փաստացի ճանաչման օգտին, որն առաջարկել են Մինսկի խմբի համանախագահները»,-«Առաջին լրատվական»-ի հետ զրույցում ասաց ռուսական Regnum գործակալության գլխավոր խմբագիր, քաղաքագետ Մոդեստ Կոլերովը՝ անդրադառնալով ապրիլի 15-ին Մոսկվայում տեղի ուենցած Մամեդյարով-Մնացականյան-Լավրով հանդիպմանը, որին հաջորդել էր նաև Մինսկի խմբի համանախագահների մասնակցությամբ հանդիպումը։
Ռուսական լրատվամիջոցների հրապարակումների համաձայն՝ այդ հանդիպման ընթացքում մի շարք հումանիտար նախաձեռնությունների վերաբերյալ պայմանավորվածություններ են ձեռք բերվել՝ մասնավորապես «գյուղատնտեսական աշխատանքների» իրականացման ժամանակ շփման գծում ապահովել կայունություն, ինչպես նաև «փոխադարձ հիմքով քայլեր ձեռնարկել ազատազրկման մեջ գտնվող անձանց հարազատների համար տեսակցություններ կազմակերպելու հարցում»: Քննարկվել է նաև «լրատվամիջոցների ներկայացուցիչների փոխադարձ ուղևորությունների» հարցը»։
Մոդեստ Կոլերովի դիտարկմամբ՝ ամենակարևոր հարցն այն է, որ այդ սկզբունքները փաստացի կրկնում են Մադրիդյան սկզբունքները.«Իսկ այդ սկզբունքները արդեն մերժվել են Լեռնային Ղարաբաղի կողմից՝ Լեռնային Ղարաբաղի ԱԳ նախարարի շուրթերով։Այդ սկզբունքները տանում են Հայաստանի կապիտուլիացիային։ Ձեռք բերված պայմանավորվածություններն ընդամենը շղարշ են, որովհետև դրանք փաստացի տանում են իմ նշած սկզբունքների ճանաչմանը, որն էլ իր հերթին բերելու է կապիտուլացիայի»,-նկատեց մեր զրուցակիցը։
Մեր այն դիտարկմանը, թե տեղի ունեցած հանդիպումը Մոսկվայի առանձին նախաձեռնություններ էր, թե տեղավորվում է ընդհանուր կարգավորման տրամաբանության մեջ, Մոդեստ Կոլերովը պատասխանեց.«Պետք է արդեն սովորել նրան, որ երբ Հայաստանի մոտ ինչ-որ բան չի ստացվում կամ վատ է ստացվում, Երևանում դա ստանում է ձևակերպում, որ այդկերպ Մոսկվային ընդառաջ են գնում։ Դա հիվանդ երևակայություն է, ինքնուրույն պետք է գործով զբաղվել։Պետք է կտրականապես հրաժարվել մադրիդյան սկզբունքներից, որի մասին վերջերս հայտարարեցին համանախագահները։ Իսկ Հայաստանը մադրիդյան սկզբունքներից հրաժարվելու փոխարեն սկսում է քննարկել ինչ-որ մանրուքներ, ձևավորումներ, որոնք դե ֆակտո լեգիտիմացնում են այս սկզբունքները, որոնք բերելու են ձեր կապիտուլացիային։ Ի՞նչ կապ ունի այստեղ Մոսկվան»։
Միևնույն ժամանակ մեր զրուցակիցը նկատեց. «Պատերազմը չի հեռվացել, այո՛ կրակոցները քչացել են, բայց բոլորը շատ լավ գիտեն, որ հիմա սկզբունքորեն նոր պատերազմի նախապատրաստություն է գնում։ Դա գիտեն և՛ Երևանում և՛ Բաքվում։ Եթե նկատի ունենանք նաև Հայաստանի Պաշտպանության նախարարի հայտարարությունը, ապա Հայաստանը պատրաստվում է հարձակվողական պատերազմի»։
Կոլերովը , սակայն, չի կարծում, որ մադրիդյան սկզբունքներից Հայաստանի հրաժարվելը կլինի ևս մեկ քայլ պատերազմը վերսկսելու համար։