Այսօր՝ ապրիլի 17-ին, Ազգային ժողովում շարունակվում են աշխատանքները: Այժմ շարունակում է քննարկվել Կառավարության կառուցվածքի և գործունեության մասին օրենքում փոփոխություններ և լրացումներ կատարելու մասին հարցը:
«Օպտիմալացմանը որևէ հիմնավոր պատճառ չբերվեց՝ բացի ինտուիցիայից, այսինքն՝ օպտիմալացումը կատարվում է՝ ապավինելով կառավարության ինտուիցիային»,- հայտարարեց «Բարգավաճ Հայաստան» խմբակցության պատգամավոր Նաիրա Զոհրաբյանը՝ հավելելով, որ այս դեպքում ինքն անգամ Վանգայի ինտուիցիայի վրա հույս չէր դնի:
«Ի՞նչ է լինելու գործազուրկ դարձող հպարտ քաղաքացու հետ. ասում են՝ մնալու են ռեզերվում, այսինքն՝ նստելու են պահեստայինի նստարանին, վստահ եմ՝ նստելու են հավերժ»,- նշեց նա:
Նաիրա Զոհրաբյանի խոսքով՝ մշակույթի նախարարությունը տարրալուծվելու է մի անհասկանալի կոնգլոմերատի մեջ: «Այդպես էլ չհասկացանք՝ ՊՈԱԿ-ների աջափսանդալի մասին՝ ինչ էին մտածել, ինչ են արել և դեռ ինչեր կարող են անել: Գաղափարը ցնցող էր. իրար միացնել Կոմիտասի քառյակը, տուն-թանգարանը, էս տրամաբանությամբ չեմ բացառում նաև Կոմիտասի անվան փողոցը և բոլոր էն տղաներին, ում անունը կլիներ Կոմիտաս: Եթե դեռ այս պահին մշակույթի պատասխանատուի համար Սոս Սարգսյանը ժանր է, իսկ օպերան թատրոն չէ, մշակութային այս նոր թրենդի մեջ ոչինչ չի կարելի բացատրել»:
Նա ընդգծեց, որ «Բարգավաճ Հայաստանը» ոչ թե ինտուիցիայով, այլ վստահ համոզմունքով դեմ է քվեարկելու ներկայացված նախագծին:
Մանրամասները՝ տեսանյութում:
