Այսօր՝ ապրիլի 17-ին, Ազգային ժողովում շարունակվում են աշխատանքները: Այժմ շարունակում է քննարկվել Կառավարության կառուցվածքի և գործունեության մասին օրենքում փոփոխություններ և լրացումներ կատարելու մասին հարցը:
«Լուսավոր Հայաստան» խմբակցության պատգամավոր Տարոն Սիմոնյանը հայտարարեց՝ չի ստացվի գնալ առաջ՝ կրկնելով նույն քայլերը. «Եթե ուզում ենք առաջ գնալ, ուրեմն պետք է սկսենք մեզնից՝ փոխենք ինքներս մեզ, բայց մենք չենք ուզում դա անել»:
Նա տեղեկացրեց՝ ամիսներ առաջ կյանքից հեռացավ 104-ամյա այն կինը, ով իմ գործընկերոջը տվեց առաջին մանդատը. «Ես մտովի ցանկանում եմ պատկերացնել՝ այդ կինն իր կյանքում ինչ է տեսել քաղաքական իշխանությունների հերթափոխի ժամանակ: Նա տեսել է հերթափոխող ղեկավարներ, ովքեր հիմնականում փնովել են նախորդին, իրականում նաև՝ արդարացի և հիմնավոր, բայց չեն հրաժարվել նախորդների ձեռքում կուտակված իշխանության վերաբաշխումից»:
Պատգամավորն ընդգծեց՝ մարդիկ փոխվում են, բայց չեն փոխվում ինստիտուտները, դրա համար մենք անընդհատ նույն իրավիճակն ենք ունենում:
Սիմոնյանը նշեց, որ իշխանության բացարձականացումը կամ կենտրոնացումը որևէ անձի կամ որոշ անձանց ձեռքում լավ բանի չի տանում. «Սկզբնական շրջանում ժողովուրդը սիրում է իշխանությանը, նրան պարգևում այդ կարևոր որոշումներն ընդունելու հնարավորություն, հաջորդ փուլում իշխանությունը սկսում է ինքն իրեն սիրել, քանի որ ավելի շատ է հայելու մեջ նայում, երրորդ փուլում իշխանությունը սկսում է զարմանալ, որ ժողովուրդն իրեն չի սիրում, և սկսում է օտարման պրոցեսը»:
Պատգամավորի խոսքով՝ սրա դեմնառնելու ճանապարհը վերահսկողական և հաշվետվողական մեթոդների ու ինստիտուտների զարգացումն է:
Տարոն Սիմոնյանն ընդգծեց՝ մենք չենք կասկածում ձեր ազնվությանը, բայց պարտավոր ենք կասկածել ձեր կարողություններին և ինքնավստահությանը. «Որովհետև դուք մարդ եք և իշխանություն ունեցող մարդ եք, և դա գայթակղություն է: Մի՛ կրկնեք նախորդ իշխանությունների դասական սխալները»:
Մանրամասները՝ տեսանյութում:
