Այսօր՝ ապրիլի 17-ին, Ազգային ժողովում շարունակվում են աշխատանքները: Այժմ շարունակում է քննարկվել Կառավարության կառուցվածքի և գործունեության մասին օրենքում փոփոխություններ և լրացումներ կատարելու մասին հարցը:
Ինչպես իր ելույթում հայտարարեց «Լուսավոր Հայաստան» խմբակցության ղեկավար Էդմոն Մարուքյանը՝ այս նախագծով նախկին արատավոր հանգամանքները չեն փոխվել. «Հայտնի է, որ այս պետական կառավարման կառուցվածքը՝ սուպերվարչապետական համակարգը, անվանվել է Սերժ Սարգսյանի կոստյում: Հիմա դուք այդ կոստյումի երկու կոճակները հանում եք, հագնում և ասում՝ սա լավ կոստյում է: Այսինքն՝ Սերժ Սարգսյանի կոստյումը չի փոխվել, և այդ սուպերվարչապետական համակարգը մնացել է»:
Նա հարցրեց՝ ինչո՞ւ վարչապետի խոստումը չեք կատարել, և ինչո՞ւ հեղափոխությունից մեկ տարի անց դուք այդպես էլ չեք կողմնորոշվում մեր կառավարման համակարգը դարձնել բաց, ժողովրդավարական. «Վարչապետն այս ամբիոնից ասել է, որ կարծում ենք՝ ԱԱԾ-ն և Ոստիկանությունը պետք է լինեն նախարարություններ»:
Էդմոն Մարուքյանը ներկայացրեց իրենց առաջարկությունները, թե որ նախարարությունները պետք է պահպանվեին. «Մեր ներկայացրած համակարգով կառավարության կառուցվածքում տեղավորվում է ամբողջ պետական կառավարման համակարգը, որը լինելու է խորհրդարանական վերահսկողության ներքո»:
Նրա խոսքով՝ Սերժ Սարգսյանի կոստյումից երկու կոճակ փոխելով վարչապետը մնացել է Ոստիկանության, ԱԱԾ-ի, ՊԵԿ-ի պետը:
Նա ներկայացրեց նաև կառավարության ներկայացրած համակարգը և ասաց. «Էս համակարգը քաոս է, նա երկար չի տևելու, դուք հետ եք գալու փոխելու, բայց ուշ է լինելու»:
Մանրամասները՝ տեսանյութում: