Լուրեր
Ընդդիմությունն ասում է՝ մեզ քարոզչական գործիք տվեք, կամ էլ սա չենք համարում խորհրդարանական վերահսկողություն
  • 09:00
  • 2019-04-17
  • Դիտումներ՝ *

Նախօրեին պետաիրավական հարցերի հանձնաժողովում կառավարության կառուցվածքի փոփոխության վերաբերյալ նախագծի քննարկման ժամանակ մանիպուլյացիան այն էր, որ կառավարության կառուցվածքի և գործունեության մասին օրենքի նպատակը, սահմանադրական նշանակությունը խեղաթյուրվում է։ Այս մասին «Առաջին լրատվական»-ի հետ զրույցում նշեց «Իմ քայլը» խմբակցության պատգամավոր Վահագն Հովակիմյանը։

«Սահմանադրությունն ասում է՝ կառավարության առաջարկությամբ, օրենքով սահմանվում է կառավարության կառուցվածքն ու գործունեությունը։ Այսինքն այդ լիազորությունը տրված է բացառապես կառավարությանը, որովհետև կառավարությունն ինքը պետք է որոշի, թե իրեն ինչպիսի կառուցվածք է անհրաժեշտ իր ծրագիրն իրականացնելու համար»,-ասաց նա։

Ինչ վերաբերում է ԱԱԾ-ն, ոստիկանությունը նախարարություններ դարձնելուն և այդպիսով այդ կառույցները խորհրդարանական վերահսկողության տակ դնելուն, Հովակիմյան ասաց. «Ես շարունակում եմ պնդել, որ ներկայիս կառուցվածքով նույն ԱԱԾ-ն, ոստիկանությունը լիարժեք խորհրդարանական վերահսկողության ներքո են։ Միակ տարբերությունն այն է, թե լրագրողների, տեսախցիկների առջև այդ կառույցների ղեկավարներին հարցեր տալու հնարավորություն կա, թե չկա։ Այսինքն ասում են՝ մեզ քարոզչական գործիք տվեք, կամ էլ մենք սա չենք համարում խորհրդարանական վերահսկողություն»։

  • Դիտումներ՝ *