Լուրեր
Իշխանության որդեգրած քաղաքականության դեմ սաբոտաժ է

Անցած հանգստյան օրերին ուշադրության կենտրոնում Արմավիրի Զարթոնք համայնքն էր իր կրակոցներով։ Կրքերը հանդարտվեցին համայնքապետի հրաժարականից հետո, կան նաև ձերբակալվածներ։ Այսօր ուշադրության կենտրոնում էր հայտնվել Գագիկ Ծառուկյանին պատկանող Արարատի ցեմենտի գործարանը, թեև դատելով ԱԺ-ում գտնվող նախագծից՝ ցեմենտագործների բողոքի ակցիան փոքր-ինչ զարմանալի է, և ստիպում է դիտարկել հարցի քաղաքական կողմը։ Իհարկե պետք է արձանագրել, որ խոսքը, ի վերջո, մի քանի հարյուր աշխատատեղի մասին է, այսինքն՝ շահառուն նաև այդ աշխատողներն են, սակայն ամեն դեպքում, փաստացի կառավարությունը քայլ է կատարում Գագիկ Ծառուկյանի համար մրցակցային արտոնյալ պայման ձևավորելու ուղղությամբ: Այդ դեպքում ո՞րն է խնդիրը:

Թեմայի շուրջ «Առաջին լրատվական»-ի հետ քննարկմանը մասնակցեցին «Մերժիր Սերժին» նախաձեռնության անդամ Դավիթ Հովհաննիսյանը, քաղաքագետներ Արմեն Բաղդասարյանը և Հայկ Սուքիասյանը:

«Գյուղապետի հակառակորդների և կողմնակիցների միջև բախում է տեղի ունեցել, անգամ կրակոցներ են հնչել, արդյունքում գյուղապետը հրաժարական է տվել. լավ է, որ գյուղացիներն իրենք են որոշում, բայց վատ է, որ այդ մեթոդներով»,- նշեց Ա. Բաղդասարյանը:- Նախկինում գյուղացիները չէին ըմբոստանում, որովհետև դա համարում էին անիմաստ, հիմա նրանք իրենց առջև խնդիրներ են դնում և հասնում դրանց լուծմանը, բայց, իհարկե, վատ մեթոդներ կիրառողները՝ մեղավորները պետք է պատժվեն»:

Հայկ Սուքիասյանի դիտարկմամբ՝ հետհեղափոխական շրջանում իշխանության քաղաքականությունը հասկանալի չէ. «ՏԻՄ-երում հարցը չի լուծվել, քաղաքական ղեկավարությունը փոխվել է, բայց որոշ տեղերում մնացել են նախկին բդեշխները, և ժողովուրդը բողոքում է: Ժողովուրդն ինքնուրույն է որոշել հարցը լուծել, բայց իշխանությունը պետք է ներքին կոնսենսուսով հարցի լուծումը իր վրա վերցներ»: Քաղաքագետի խոսքով՝ բողոքի բացիլները կարող են շարունակվել. «Ցանկացած իշխանության լեգիտիմությունը կախված է հասարակության ներքին կայունության ապահովման գործառույթից, եթե իշխանությունը չկարողանա կայունությունն ապահովել, լեգիտիմությունն անկում է ապրելու»:

Դ. Հովհաննիսյանը հակադարձեց՝ նշելով, որ անկայունության դրսևորում չկա, խոսքն անցումային իրավիճակի մասին է. «Երկրում վերին մակարդակում տեղի է ունեցել իշխանափոխություն, բայց ՏԻՄ-երում շարունակում են մնալ նախկին համայնքապետերը՝ հին մտածելակերպով և աշխատաոճով: Եթե համայնքի բնակիչները ցույցեր են կազմակերպում, դժգոհում են, ապա հարցի լավագույն լուծումը հրաժարականն է»: Դ. Հովհաննիսյանի խոսքով՝ այս հարցի լուծման նաև օրենսդրական տարբերակ կա՝ երկու անգամ ընտրվելուց հետո համայնքապետն այլևս առաջադրվելու իրավունք չպետք է ունենա:

Հայկ Սուքիասյանի դիտարկմամբ՝ պետությունը ընտրել է հստակ քաղաքականություն՝ դեմոկրատական կայացման ճանապարհը. «Բայց կան ուժեր, այդ թվում նաև ԲՀԿ-ն, որը «սիրախաղերի վարպետ է», սաբոտաժ են անում իշխանության որդեգրած քաղաքականության դեմ»: Դ. Հովհաննիսյանը հավեեց, որ հակահեղափոխության վտանգ դեռևս կա. «Հեղափոխության առաջ քաշած ծրագրերից ոչ մեկը դեռ ավարտին չի հասել, անցումային փուլում են: Նախկին կոռուպցիոն ռեժիմի կողմից ֆինանսավորվում են լրատվամիջոցներ, քաղաքական ուժեր, քաղաքացիական ակտիվիստներ. հեղափոխության դեմ ռևանշիստական շարժում է սկսվել, այլ ոչ թե քաղաքական պայքար, և նպատակը հեղափոխության արդյունքները չեղարկելը և վերադառնալն է»:

Մանրամասն՝ տեսանյութում:

  • Դիտումներ՝ *