Ազգային անվտանգության ռազմավարության նոր փաստաթղթի մշակման աշխատանքների շրջանակում Անվտանգության խորհրդի քարտուղար Արմեն Գրիգորյանը հանդիպել է փորձագիտական հանրության ներկայացուցիչների հետ, հանդիպմանը մասնակցել են նաև քաղաքագետ Ռուբեն Մեհրաբյանը և Կառավարման ակադեմիայի գիտաշխատող Ջոնի Մելիքյանը:
Ազգային անվտանգության ռազմավարության փաստաթղթի մշակումը պայմանավորված է նրանով, որ նախորդ փաստաթուղթը ընդունվել է այլ իրականության մեջ՝ 2007թ, իսկ դրանից հետո շատ բան է փոխվել թե՛ մեր տարածաշրջանում, թե՛ տարածաշրջանից դուրս, նոր մարտահրավերներ կան,- «Առաջին լրատվական»-ի հետ զրույցում նշեց Ջ. Մելիքյանը:- Մասնագիտական հանրության հետ լայն ֆորմատի քննարկումներ են տեղի ունենում: Կարևոր է, որ ազգային անվտանգության ռազմավարության փաստաթղթի մշակման գործընթացը սկսվել է:
Ռ. Մեհրաբյանը հավելեց, որ 2007թ. փաստաթուղթը, ինչպես կյանքը ցույց տվեց, գրվել է ոչ թե նրա համար, որ դրանով առաջնորդվի պետությունը, այլ պարզապես լինելու համար. «Այն քաղաքականությունը, որ վարվել է մեր պետությունում, բացարձակ կապ չունի այդ փաստաթղթի հետ, այն ունի դեկլարատիվ, անգամ դեկորատիվ նշանակություն»:
Քաղաքագետի դիտարկմամբ՝ աշխարհը շատ է փոխվել՝ համեմատած 2007-ի հետ, և նոր փաստաթղթի անհրաժեշտություն կա, բայց այն իմաստ կունենա, եթե այդ փաստաթղթով առաջնորդվեն քաղաքականություն վարելիս. «Այդ փաստաթղթով սպառնալիքներին սթափ գնահատական կտրվի և կհստակեցվեն դրանց հաղթահարման մոտեցումները, պատկերացումները, առանց դրա մեր երկրում վարվող քաղաքականությունը նման կլինի հրշեջի աշխատանքի…»:
Մանրամասն՝ տեսանյութում:
