Վերջին օրերի լուսավոր իրադարձությունների շարքում կարելի է դասել մեր մարզիկների փայլուն ելույթները տարբեր հեղինակավոր մրցաշարերում: Ապրիլի 10-ին Բուխարեստում ըմբշամարտի Եվրոպայի առաջնությունում տպավորիչ ելույթով աչքի ընկավ 19-ամյա ազատ ոճային Արսեն Հարությունյանը: Պարտության մատնելով բոլոր մրցակիցներին՝ նա հռչակվեց Եվրոպայի չեմպիոն: Այս ըմբիշի խառնվածքը, կամային հատկանիշներն ու բարձր պրոֆեսիոնալիզմն ուղղակի հիացմունք են առաջացնում, և հույս ունենք, որ Հարությունյանը մոտ ապագայում էլ ավելի բարձր արդյունքներ կգրանցի:
Ընդամենը մեկ օր անց՝ ապրիլի 11-ին, Բաթումում ընթացող ծանրամարտի Եվրոպայի առաջնությունում 89 քաշային Հակոբ Մկրտչյանը դարձավ չեմպիոն, իսկ Դավիթ Հովհաննիսյանը բրոնզե մեդալ նվաճեց: Արդեն ապրիլի 13-ին ծանրամարտի Եվրոպայի առաջնությունում 109 քաշային Սիմոն Մարտիրոսյանը ոսկե մեդալ նվաճեց, իսկ 102 քաշային Սամվել Գասպարյանը դարձավ փոխչեմպիոն: Գերծանր քաշայինների պայքարում էլ Ռուբեն Ալեքսանյանը դարձավ Եվրոպայի առաջնության բրոնզե մեդալակիր: Ապրիլի 13-ին Եվրոպայի առաջնության բրոնզե մեդալակիր դարձավ Օլիմպիական խաղերի փոխչեմպիոն, աշխարհի չեմպիոն, հունահռոմեական ոճի ըմբիշ Արսեն Ջուլֆալակյանը: Մեր երկրի համար բրոնզե մեդալ նվաճեց նաև մարմնամարզիկ Վահագն Դավթյանը: Նա երրորդ արդյունքն էր գրանցել Լեհաստանում ընթացող Եվրոպայի առաջնությունում օղակների վրա վարժությունում: Նույն օրը հերթական հաջողությունը գրանցեց բռնցքամարտիկ՝ 51 քաշային Անուշ Գրիգորյանը: Մոտ մեկ ամիս առաջ երիտասարդների Եվրոպայի առաջնությունում հաղթող դառնալուց հետո Գրիգորյանը Գերմանիայում դարձավ աշխարհի գավաթակիր: Աշխարհի գավաթի խաղարկությունում Հայաստանի մեկ այլ ներկայացուցիչ՝ 49 քաշային Արթուր Հովհաննիսյանն էլ արծաթե մեդալ նվաճեց: Երեկ ապրիլի 14-ին ըմբշամարտի Եվրոպայի առաջնությունում բրոնզե մեդալ նվաճեց Կարեն Ասլանյանը:
Ու փաստորեն 5 օրվա ընթացքում մեր մարզիկները վաստակեցին 4 ոսկե, 2 արծաթե և 5 բրոնզե մեդալ: Արդյունքն իսկապես տպավորիչ է: Կարող էինք ունենալ ևս մեկ ոսկե մեդալ, եթե ծանրորդ Անդրանիկ Կարապետյանը մրցահարթակ դուրս գար: Հիշեցնենք, որ Կարապետյանին մրցավարները թույլ չէին տվել ելույթ ունենալ անձնական ավելորդ քաշ ունենալու պատճառով:
Հատկապես ուրախալի է, որ մեդալ նվաճած գրեթե բոլոր մարզիկները բավական երիտասարդ են: Թվարկված մարզիկներից վետերան կարելի է համարել Արսեն Ջուլֆալակյանին, Վահագն Դավթյանին և որոշակի վերապահումով՝ Ռուբեն Ալեքսանյանին: Մյուս մարզիկների միջին տարիքը 20-21 է: Նրանց հետ մեծ հույսեր ենք կապում, և կան բոլոր նախադրյալները գալիք տարի տեղի ունենալիք Օլիմպիական խաղերում լուրջ հաջողություններ գրանցելու:
Չմոռանանք նաև երիտասարդ ծանրորդներին, որոնք փոքր մեդալներ նվաճեցին: Մասնավորապես, 16-ամյա ծանրորդ Լիանա Գյուրջյանը փոքր արծաթե մեդալ նվաճեց 81 քաշայինների հրում ձևում: Փոքր ածաթե մեդալ էր նվաճել նաև 59 քաշային Իզաբելլա Յայլյանը, իսկ 87 քաշային Տաթևիկ Հակոբյանն արժանացել էր փոքր բրոնզե մեդալի:
Այսօր մենք ունենք հիանալի սերունդ, որը կարող է և պետք է դառնա մեր սպորտի վաղվա օրը: Ժամանակին համաշխարհային սպորտում հազվադեպ էինք լուրջ արդյունքներ գրանցում, իսկ այսօր մի քանի օրվա ընթացքում նվաճված մեդալները հաշվելու համար ժամանակ է պահանջվում: Այս մարզիկները տարբեր երկրներում բարձր են պահել մեր երկրի պատիվը, բարձրացրել են Հայաստանի հեղինակությունը: Կարծում ենք՝ շատերը կհամաձայնեն, որ ոսկե այս սերունդն արժանի է մեծ ուշադրության հատկապես պետության կողմից: Ուշադրությունը մեծացնելու և խրախուսման դեպքում վստահ ենք, որ էլ ավելի կմեծանա մոտիվացիան, ինչը հաջողության հասնելու հիմնական բաղադրիչներից է:
Մենք ունենք Սիմոն Մարտիրոսյանի պես համաշխարհային մակարդակի ֆիգուր, որն ընդամենը 22 տարեկան է և ունի բոլոր հնարավորությունները մի քանի անգամ օլիմպիական և աշխարհի չեմպիոն դառնալու: Արսեն Հարությունյանը բոլորովին նոր խոսք հաղորդեց ըմբշամարտին: Անուշ Գրիգորյանը մեկը մյուսի հետևից ոսկե մեդալներ է նվաճում՝ շանս չտալով մրցակիցներին: Չմոռանանք նաև մեր մյուս հայտնի մարզիկներին, մասնավորապես Օլիմպիական չեմպիոն Արթուր Ալեքսանյանին, որն արդեն ապաքինվել է վնասվածքից և պատրաստվում է գալիք տարվա օլիմպիական խաղերին:
Ընդհանուր առմամբ առաջիկա ամիսները խիստ կարևոր են լինելու մեր մարզիկների համար, որոնք մասնակցելու են տարբեր օլիմպիական վարկանիշային մրցումների: Գրանցված արդյունքները կարևոր ազդակ էին Օլիմպիական խաղերի շեմին: Ազդակ էին պետությանը, որը պարտավոր է մինչև Օլիմպիական խաղերը ոչինչ չխնայել մարզիկներին պատշաճ կերպով նախապատրաստելու և անհրաժեշտ պայմաններով ապահովելու համար:
Վերջին օրերին կրկին համոզվեցինք, որ սպորտը խիստ կարևոր ճյուղ է հասարակության համար, որն ունի համախմբելու, ինչպես նաև դրական էմոցիաներով լիցքավորելու հատկություն: Այսօր հասարակության շրջանում շրջանառվող հիմնական թեմաներից են մեր ծանրորդների և ըմբիշների, բռնցքամարտիկների նվաճումները մեծ սպորտում:
