Ռուսաստանի ԱԳՆ ղեկավար Սերգեյ Լավրովը բացատրել է հաշիվներում դոլարից հեռանալու Եվրասիական տնտեսական միության երկրների ձգտումը: Նրա խոսքով՝ ԵԱՏՄ-ի ապադոլարացումը կապված է իր արժույթի ԱՄՆ չարաշահման ռիսկերի հետ:
Ելույթ ունենալով Արտաքին և պաշտպանական քաղաքականության խորհրդի XXVII վեհաժողովում՝ նախարարը ընդգծել է, որ միության մեջ ներքին ապրանքաշրջանառության ավելի քան 60%-ը կատարվում է ազգային արժույթներով՝ փոխանցում է TASS-ը:
«Այս բաժինը մշտապես աճում է: Մենք աստիճանաբար հեռանում ենք դոլարից՝ կապված դրա օգտագործման ռիսկերի հետ…»,- նշել է Ռուսաստանի ԱԳՆ ղեկավարը:
Անցած տարվա դեկտեմբերին Ռուսաստանի ֆինանսների նախարարությունը 2020-2021 թվականներին ԵԱՏՄ-ում հնարավոր համարեց միասնական թվային արժույթի ստեղծումը: Միության կազմի մեջ են մտնում Ռուսաստանը, Հայաստանը, Ղազախստանը, Բելառուսը և Ղրղըզստանը: