Twitter-ում անհայտ հաքերներ կոտրել են FoxNews հեռուստաալիքի լրատվական էջը և հրապարակել են Օբամայի մահվան մասին տեղեկություն: Այս մասին գրում է The Guardian-ը: Գիշերը երկուսին մոտ foxnewspolitics էջը իր 33 հազար հետևորդներին ուղարկել է հաղորդագրություն, որում տեղեկացրել է, որ ԱՄՆ նախագահ Բարաք Օբաման սպանվել է:
«Բարաք Օբաման հենց նոր հեռացավ: Նախագահը զոհվել է: Սա իրականում շատ տխուր հուլիսի 4 է (ԱՄՆ անկախության օր.- 1in.am)»,- ասվում է հրապարակման մեջ: Ավելի ուշ հաղորդագրության մեջ նշվում էր, թե ինչից է մահացել նախագահը, ինչ պայմաններում: Դրանից հետո հաքերները ցավակցություն էին հայտնել ԱՄՆ նախագահի ընտանիքին, իսկ վերջին հաղորդագրությամբ՝ նախագահ «դարձրել» Ջո Բայդենին, որին փոխանցվել էր իշխանությունը՝ օրենքի համաձայն:
FoxNews-ից այս մասին ոչ մի մեկնաբանություն չի արվել:
