Այս օրերին հանրային դիսկուրսի գլխավոր թեման վարչապետ Նիկոլ Փաշինյանի՝ Նորագավիթի մաքսատուն այցն էր, և այդ այցի ընթացքում աշխատողներից մեկին տրված հանձնարարականը՝ դիմում գրել և ազատվել աշխատանքից դրոշը կեղտոտ պահելու համար։
«Նախ, սկսենք նրանից, թե ինչը ինչի հետ ենք համեմատում՝ մարդուն, որին զրկում ենք իր կենսական միջոցներից և պետության խորհրդանիշը՝ դրոշը։ Եթե սկսենք օրենքները դիտարկել՝ սկսած Սահմանադրությունից, ապա Սահմանադրության 3-րդ հոդվածը ասում է, որ մարդը, նրա արժանապատվությունը և նրա հիմնարար իրավունքները բարձրագույն արժեք է երկրում։ Պետության խորհրդանիշների մասին Սահմանադրությունն անդրադառնում է 13-րդ հոդվածով՝ զուտ նկարագրական, թե ինչ է իրենից ներկայացնում դրոշը, զինանշանը։ Եթե այստեղ մենք դիտարկում ենք առաջնահերթությունների տեսանկյունից, ապա այդ դեպքում մարդը բարձրագույն արժեք է, և հանրային կերպով նրա արժանապատվությունը ոտնահարելը և նրան զրկելը կենսական միջոցներից, իհարկե, առավել անհամատեղելի է դրոշի հանդեպ վերաբերմունքից։ Բայց, մյուս կողմից, այս դեպքում պետք է հասկանանք, թե ինչ է կատարվել պետության խորհրդանիշի հետ։ Արդյո՞ք այդտեղ խորհրդանիշի դիտավորյալ անարգում էր կատարվել, որը քրեորեն պատժելի է»,- «Առաջին լրատվական»-ի հետ զրույցում ասաց իրավապաշտպան Զարուհի Հովհաննիսյանը։
Իսկ Հելսինկյան քաղաքացիական ասամբլեայի Վանաձորի գրասենյակի նախագահ Արթուր Սաքունցն ասաց․ «Ես հասկանում եմ, որ մենք փորձում ենք օրենսդրության շրջանակում հարցը լուծել կամ քննարկել։ Խնդիրն այն է, որ այստեղ շատ ավելի կարևոր է բովանդակային մասը։ Արդյո՞ք մենք գտնում ենք, որ դա այն ոճն է, որ իշխանություն ունեցող անձնավորությունը պետք է վերաբերվի քաղաքացու նկատմամբ։ Դա շատ ավելի կարևոր նշանակություն ունի»։
Մանրամասները՝ տեսանյութում։