Հայաստանում տեղի ունեցած հեղափոխությունից արդեն գրեթե մեկ տարի է անցել, և այս ժամանակը թույլ է տալիս որոշակի ամփոփումներ անել, գալ որոշակի եզրահանգումների։ Հանրային ընկալումների մասով ի՞նչ է կատարվել, ի՞նչ է հիմա կատարվում և ի՞նչ կարող ենք սպասել «Առաջին լրատվական»-ի հարցին Միջազգային և անվտանգության հարցերի հայկական ինստիտուտի փորձագետ, սոցիոլոգ Սյուզաննա Բարսեղյանը պատասխանեց․ «Կարող ենք արձանագրել, որ, այո, հեղափոխության օրերին մեծ ոգևորություն էր, մեծ սպասելիքներ կային, բայց կյանքը պետք է վերադառնար իր բնականոն հունին, և այդ հեղափոխական էյֆորիային արդեն հաջորդեին գործնական քայլերը, որոնք պետք է մարդկանց կյանքն իրականում փոխեին, և ոչ թե հույսերի, սպասումների մակարդակով մնային։ Հիմա, կարծես թե, մենք այդ փուլում ենք։ Մենք այս պահին չունենք սոցիոլոգիական հանրային կարծիք, որպեսզի գնահատենք, թե ինչպիսին է իշխանության նկատմամբ վերաբերմունքը, վստահությունը։ Բայց ամեն դեպքում, բնակչության կողմից աջակցությունը դեռ կա, դա ակնհայտ է։ Եվ այժմ, կառավարությունը գործնական քայլերով պետք է փոխի մարդկանց կյանքը՝ քաղաքական հայտարարություններից անցում կատարի իրական քաղաքականության»։
Իսկ «Գելլափ Ինթերնեյշնլ» Ասոցացիայի հայաստանյան գրասենյակի ղեկավար Արամ Նավասարդյանն էլ ասաց․ «Առջևում, միանշանակ, կլինի սոցիոլոգիական հարցում։ Մենք արդեն պատրաստել ենք հարցաթերթը։ Ես կարծում եմ, որ մենք արդյունքները կունենանք մինչև մայիսի 10-ը և կհրապարակենք դրանք, որից հետո կկարողանանք ասել՝ այդ վերաբերմունքը փոփոխվել է դեպի դրակա՞ն, թե՞ բացասական»։
Մանրամասները՝ տեսանյութում։