Նիկոլ Փաշինյանի ելույթը ԵԽԽՎ-ում շատ կարևոր էր այն առումով, որ այն ցույց տվեց, որ այսօր մեր հարաբերությունները Եվրոպայի խորհրդի հետ լրիվ նոր տրամաբանությամբ են կառուցվում։ Այս մասին «Առաջին լրատավական»-ի հետ զրույցում նշեց «Իմ քայլը» խմբակցության պատգամավոր Միքայել Զոլյանը։
Նրա խոսքով՝ նախկինում անգամ մեր նախկին ղեկավարներն ասում էին, որ Ստրասբուրգը կամ Բրյուսելը մեզ համար Տիզբոն չի կամ ռայկոմ չի. «Իրականում դա ցույց էր տալիս, որ իրենց մտածողության մեջ հենց այդպես է. Այսինքն՝ նախկինում ընկալվում էր, որ ԵԽ-ն մի կազմակերպություն է, որին մենք անդամակցել ենք ուղղակի որովհետև այդպես ընդունված է, կամ դա պետք է, որ միջազգային ֆինանսական աջակցություն ստանանք, իրականում դա մեզ պետք չի։ Մենք ընդամենը իմիտացիայով ենք զբաղվում, որ մեզ մոտ հարգվում են ժողովրդավարական արժեքները, սակայն իրականում մեզ դա չի հետաքրքրում։ Իսկ այժմ լրիվ այլ տրամաբանություն է գործում։ Նիկոլ Փաշինյանն իր ելույթի սկզբում պատմում էր, թե որքան կարևոր է մեզ համար ԵԽԽՎ-ին անդամակցությունը և դա ինչպես օգնեց մեզ մեր պայքարում»,-ընդգծեց Զոլյանը։