Փաշինյան-Ալիև հանդիպումից հետո երկու կողմն էլ այն գնահատեցին որպես կառուցողական հանդիպում, սակայն հանդիպումից ժամեր անց ՀՀ պաշտպանության նախարար Դավիթ Տոնոյանի՝ Նյու Յորքում արված հայտարարությունը՝ «նոր պատերազմ՝ նոր տարածքներ», իրարանցում առաջացրեց ադրբեջանցիների մոտ, այնինչ Տոնոյանը ֆիքսեց այն, ինչ այս ամիսների ընթացքում հասցրել էր մի քանի անգամ ասել վարչապետ Նիկոլ Փաշինյանը. ««Տարածքներ՝ խաղաղության դիմաց» թեզն այլևս ակտուալ չէ»:
Թեմայի շուրջ «Առաջին լրատվական»- ի հետ զրույցում «Ազգային օրակարգ» կուսակցության համահիմնադիր Արա Հակոբյանը ներկայացրեց իր դիտարկումները. «Դ. Տոնոյանը վերաձևակերպեց բանաձևը, և ադրբեջանցիների արձագանքը հիմնականում դրան էր վերաբերում: Երկու կողմն էլ հանդիպումը կառուցողական գնահատեցին, սակայն այդ հանդիպման կառուցողականության բովանդակային մասն անհասկանալի է մնացել առ այսօր: Այնուամենայնիվ, հանդիպումից հետո կողմերը մնացին իրենց կարծիքին, մասնավորապես Արցախի՝ բանակցային գործընթացում ներգրավվածության հարցում… Տոնոյանի և Փաշինյանի հայտարարություններում հակասություն կա»:
Արա Հակոբյանի դիտարկմամբ՝ ինչքան էլ մենք խոսենք խաղաղության մասին, Ադրբեջանը պատրաստ չէ խաղաղության. «Ադրբեջանը պատրաստ չէ որևէ բան զիջելու: Բաքուն ուզում է գրավել ամբողջ Արցախը, և որպես իր տարածք՝ վերցնել իր տնօրինության տակ: Ադրբեջանը պատրաստ է ցանկացած գործիք օգտագործել իր նպատակին հասնելու համար»:
Մանրամասն՝ տեսանյութում: