Դեռևս ընտրություններից առաջ շատ էր խոսվում հակակոռուպցիոն ունիվերսալ մարմին ունենալու անհրաժեշտության մասին։ Այս բացը դեռ կա, հարցը շարունակում է մնալ օրակարգային։
Ասել, որ նախկին իշխանությունները չեն հաջողել կոռուպցիայի դեմ պայքարում, ասել է, թե գրեթե ոչինչ չասել։ Նախկինում կոռուպցիան համակարգային բնույթ էր կրում, և կարող ենք փաստել, որ հովանավորվում էր ամենաբարձր մակարդակով՝ չնայած, որ ունեինք կոռուպցիայով զբաղվող մի քանի մարմիններ։ Այժմ խոսվում է այդ մի քանի կոռուպցիոն մարմինների փոխարեն ունենալ մեկ ունիվերսալ հակակոռուպցիոն մարմին։ Ինչո՞ւ մեկ ունիվերսալ մարմին, և ի՞նչ առավելություն ունի կենտրոնացված հակակոռուպցիոն ինստիտուցիոնալ մոտեցումը «Առաջին լրատվական»-ի հարցին Հայաստանի ՔՀԿ-ների հակակոռուպցիոն կոալիցիայի իրավաբան-փորձագետ Արտյոմ Մեսրոպյանը պատասխանեց․ «Առաջինը, որ ունիվերսալ հակակոռուպցիոն մարմնի առավելությունների մասին է խոսում միջազգային փորձը։ Մի շարք երկրներում ունիվերսալ հակակոռուպցիոն մարմինը հաջողությունների է հասել, և այդ հաջողությունը պայմանավորված է եղել նաև քաղաքական բարձր կամքի առկայության պարագայում։ Միջազգային փորձի ուսումնասիրությամբ վստահորեն կարող ենք ասել, որ այդ փորձը կիրառելի է նաև Հայաստանում, և դրա կիրառման մեխանիզմները բխում են նաև մեր Սահմանադրությունում ամրագրված իրավական սկզբունքներից, ինչպես նաև միջազգային մի շարք փաստաթղթերից»։
Իսկ «Քաղաքացու որոշում» սոցիալ-դեմոկրատական կուսակցության գործադիր մարմնի անդամ Միքայել Նահապետյանն էլ ասաց․ «Մեր կուսակցությունն ընտրություններից առաջ ասում էր ունիվերսալ, և ընտրություններից հետո էլ ասում է ունիվերսալ, իսկ կառավարությունն ընտրություններից առաջ ասում էր ունիվերսալ, իսկ հետո՝ ոչ։ Ես կարծում եմ, որ սա սկզբունքային տարբերություն է։ Այո, մենք մեր նախընտրական ծրագրում ֆիքսել ենք, որ պետք է ունենանք ունիվերսալ հակակոռուպցիոն մարմին, որովհետև լինելով կենտրոնացված, պարզ կլինի՝ ով է մեղավոր, որ գործը տեղից չի շարժվում»։
Մանրամասները՝ տեսանյութում։
