Երեկ ՀՀ վարչապետ Նիկոլ Փաշինյանը ելույթ ունեցավ ԵԽԽՎ-ում և պատասխանեց պատգամավորների մի շարք հարցերին: Այդ ելույթում հնչած մի շարք հետաքրքիր շեշտադրումներին անդրադառնալու համար «Առաջին լրատվական»-ը հյուրընկալել է արտակարգ և լիազոր դեսպան Արման Նավասարդյանին և քաղաքագետ Արմենակ Մինասյանցին:
Արման Նավասարդյանը նախ անդրադարձավ ելույթի ձևին և բովանդակությանը. «Ելույթը կառուցված էր ճիշտ, հավասարակշռված: նա խոսեց բոլոր առանցքային խնդիրների մասին: Վարչապետը գովեց-գովեց և հետո բավական կոշտ՝ իրեն շատ հատուկ (ինչը ես ողջունում եմ), ասաց՝ դա ինչ կազմակերպություն է, որ երկու տարի առաջ ուներ այդպիսի դիրքորոշում: Այդ երկու փաստաթղթերից մեկը, որն անցել էր ԵԽԽՎ-ում, հաղթաթուղթ դարձավ Բաքվի ձեռքին: Այնպես որ՝ պետք է ողջունել այդ ելույթը, դա իր ոճն էր, մինչ այդ ոչ ոք նման բան չէր ասել և չի էլ ասի»:
Արմենակ Մինասյանցը ևս կարծում է, որ Փաշինյանի ելույթը սկզբունքորեն տարբերվող էր նախկինում Հայաստանը ներկայացրած անձանց ելույթներից: «Արցախի հարցին պետք է մոտենալ միջազգային իրավունքի տեսակետից: Փաշինյանի հայտարարությունը օդից չէր, թե՝ ինչու չեք օգնում: Սա կարող էր անակնկալ լինել ԵԽԽՎ պատգամավորների համար՝ նրանք սովոր չեն, որ գան իրենց մեղադրեն»,- նկատեց քաղաքագետը:
Արմենակ Մինասյանցի կարծիքով՝ վարչապետը իր ելույթով զգոնության կոչ արեց ԵԽԽՎ-ին և, ինչը շատ ավելի կարևոր է, կրկին վերահաստատեց մեր հավատարմությունը ԵԱՀԿ Մինսկի խմբին:
Հարցազրույցն ամբողջությամբ՝ տեսանյութում:
