«Վերին աստիճանի հաջողված ելութ էր՝ ֆանտաստիկ նախաբանով: Մուտքի խոսքում իր հետաքրքիր անձնական պատումի հիման վրա մարմնավորեց ժողովրդավարություն պահանջող մի ամբողջ հասարակության կերպար, ընդգծեց նաև ԵԽԽՎ-ի բարենպաստ դերը»,- այս մասին «Առաջին լրատվական»-ի հետ զրույցում ասաց ՄԱՀՀԻ-ի տնօրեն, քաղաքագետ Ստեփան Սաֆարյանը՝ գնահատելով ապրիլի 11-ին Եվրոպայի խորհրդի խորհրդարանական վեհաժողովի գարնանային նստաշրջանի նիստում ՀՀ վարչապետ Նիկոլ Փաշինյանի ելույթը: Քաղաքագետի դիտարկմամբ՝ վարչապետի ելույթում ընդգծվում էր, որ Հայաստանի հասարակությունը, անկախ նրանից, թե արտաքին որևէ տերություն օգնել է կամ ինչ չափով է օգնել, ազատության և իրավունքի համար անմար պայքար է մղել, և ժողովրդի, ընդդիմության համառությունը ի վերջո բերել է սպասված փոփոխությունների, ու վերջապես բոլորին անսպասելիորեն զարմացրած հեղափոխությունն իրականություն է դարձել:
Ս. Սաֆարյանի կարծիքով՝ նոր և ճիշտ էր այն մոտեցումը, որ ԵԽԽՎ-ի հասցեին հնչած դրվատանքի խոսքերի հետ հնչեցին նաև քննադատության խոսքեր. «Փաշինյանը ԵԽԽՎ ամբիոնը հռչակեց խաղաղության ամբիոն: Եվ խոսելով 2015թ. Սարսանգի ջրամբարի վերաբերյալ զեկույցի մասին՝ Փաշինյանն անդրադարձավ այն գործոններ դեր խաղացին 2016թ. Ապրիլյան պատերազմի համար, և նշեց, որ կոնֆլիկտի կողմ դարձնելու փորձերը մի պահ այդ խաղաղության ամբիոնը դարձրել էին պատերազմի հրձիգ: Փաշինյանը նշեց, որ դա ոչ թե ԵԽԽՎ-ն գիտակցաբար է արել, այլ ներքաշվել է, և սթափության կոչ արեց: Նա նաև ընդգծեց, որ խաղաղությունը կոնֆլիկտի կողմերից պետք է գա. խաղաղությունը գալիս է ժողովրդավարական փոփոխություններից, հասարակությունների կառուցողական շփումներից»:
Մանրամասն՝ տեսանյութում:
