«Бей своих, чтобы чужие боялись. ասում էին Սովետական միությունում: Հարկավոր է հենց յուրայիններից սկսել: Դա նշանակում է, որ իշխանության համար տարբերություն չկա, թե ով է իրավախախտը, ով է կոռուպցիոները»,-«Առաջին լրատվական»-ի հետ զրույցում ասաց ԳԽ նախկին պատգամավոր Ազատ Արշակյանը՝ անդրադառնալով վերջին շրջանում իշխանության կողմից կոռուպցիայի դեմ տարվող պայքարին և աղմկահարույց ձերբակալություններին:
Հիշեցնենք, որ օրեր առաջ ձերբակալվեց առողջապահության փոխնախարարը՝ կաշառք վերցնելու գործով: Օրերս ձերբակալվեց և կալանավորվեց դատավոր: Հարկերից խուսափելու համար երեկ կալանավորվեց «Սպայկա» ընկերության տնօրենը:
Ամեն դեպքում, Արշակյանի խոսքերով՝ ավելի գործնական, ավելի վճռական պետք է լինել, օրենսդրական դաշտ ստեղծել, իրավապահ համակարգը ենթարկել լուրջ կադրային փոփոխությունների։ «Ես մաթեմատիկական բան եմ ասում, բայց առկա կադրերի 70 տոկոսը պետք է պաշտոնանկ արվի, իսկ 30 տոկոսը՝ պահպանվի: Մրցույթ պետք է անցկացվի և մրցույթում հաղթածները մնան համակարգում: Դա արդարության մրցույթ չի լինելու, այլ լինելու է պրոֆեսիոնալների մրցույթ: Դա պետք է արվի և՛ դատարաններում, և՛ քննչական մարմիններում, և՛ ոստիկանությունում: Այդ կառույցներում միայն հաղթողները պետք է պահպանեն իրենց պաշտոնները: Այդ պարագայում արդարադատությունն ավելի վստահելի կլինի: Իսկ առհասարակ, այո, պրոցեսը սկսվում է յուրայիններից: Դա շատ ողջունելի է, քանի որ մյուսները տեսնում են, որ եթե յուրայինները պատժվում են, ապա նույնն էլ իրենց է սպառնում»,- ասաց Արշակյանը՝ հավելելով, որ կոռուպցիայի դեմ իմունիտետ ունեցող անձինք պետք է ամեն կերպ դուրս մնան կառավարման պետական համակարգից, որի համար պայքարը պետք է անընդհատ լինի:
«Թրանսփարենսի ինթերնեշնլ» հակակոռուպցիոն կենտրոնի ծրագրերի ղեկավար Վարուժան Հոկտանյանը ևս դրական է համարում, որ իշխանությունները ձերբակալում են նաև յուրայիններին, որոնք ներքաշված են տարբեր կոռուպցիոն սխեմաների մեջ։ «Սա ես շատ դրական եմ գնահատում. դա վկայում է քաղաքական կամքի առկայության մասին, որը փաստորեն դրսևորվում է ոչ միայն նախկինների, այլև ներկաների նկատմամբ»,- վերջերս «Առաջին լրատվական»-ի հետ զրույցում ասել էր Հոկտանյանը։ Նրա խոսքերով, սակայն, կա նաև մի փոքր հիասթափություն, որ հեղափոխությունից հետո կարճ ժամանակաընթացքում ի հայտ եկան հեղափոխության այն «պապուտչիկները», որոնք օգտվեցին հեղափոխության արդյունքներից: «Սպասելի էր, որ հեղափոխական ալիքին նաև փրփուրը կխառնվի»,- ասաց Վարուժան Հոկտանյանը՝ հիշեցնելով հայտնի խոսքը, թե հեղափոխությունը ծրագրում են ռոմանտիկները, իրականացնում են ֆանատիկները, իսկ օգտվում են տականքները: Իսկ թե ինչպես կարելի է արմատապես վերացնել կոռուպցիան, Վարուժան Հոկտանյանը նշեց՝ կոռուպցիան ուղղակի հանցագործություն չէ, դա նաև մտածելակերպ է. «Հայաստանում պետք է անխուսափելի լինի պատիժը. ոչ միայն կոռուպցիոն, այլև ցանկացած հանցագործություն պետք է պատժվի, այսինքն՝ ոճիր և պատիժ սկզբունքը չպետք է լինի միայն գեղարվեստական գրականության մեջ, այլ նաև իրական կյանքում: Իսկ որպեսզի բանը դրան չհասնի, երկրորդ կարևոր բաղադրիչը կանխարգելումն է»: