«Կարծում եմ՝ սա շատ կարևոր միջոցառում է ու առիթ, և երկրների ղեկավարներից պատվիրակներն ակնկալում են լսել, թե ինչ ուղղությամբ է ընթանում երկիրը, ինչ բարեփոխումներ են իրականացվել և նախատեսվում իրականացնել: Եվ ես հույս ունեմ, որ ՀՀ վարչապետը կխոսի այն բարեփոխումների մասին, որոնք կատարվել են մինչև հիմա կամ պետք է կատարվեն»,- անդրադառնալով ԵԽԽՎ-ում ՀՀ վարչապետ Նիկոլ Փաշինյանի ելույթին՝ Ստրասբուրգում «Առաջին լրատվական»-ին հայտնեց «Լուսավոր Հայաստան» խմբակցության ղեկավար Էդմոն Մարուքյանը:
Մարուքյանը, սակայն, հավելեց, որ հավանաբար Փաշինյանը խոսելու է արվելիք բարեփոխումների մասին, որովհետև մինչև հիմա ըստ էության բարեփոխումներ չեն եղել, եղել են լոզունգներ. «Ամենամեծ բարեփոխումը, որ պետք է արվի, դեռ չի հաստատվել՝ դա կառավարության կառուցվածքն է: Խոսվել է անցումային արդարադատության և այլնի մասին, բայց որևէ օրենսդրական ակտ դեռ խորհրդարան չի հասել: Հիմա տեսնենք՝ վարչապետն այստեղ ինչ ելույթ կունենա, այսինքն՝ ինստիտուցիոնալ կներկայացնի՞, թե ինչ է նախատեսում իշխանությունը, և ինչ է արվել մինչև այսօր»:
Մարուքյանը թույլ փաստարկ է համարում այն, որ բարեփոխումները նոր են սկսվում, քանի որ 3 ամիս է անցել ԱԺ ընտրություններից. «Պատվիրակները հետևում են Հայաստանին և գիտեն, որ իշխանության են եկել մայիսի 8-ից: Նույնիսկ, եթե ասեն՝ լավ, նոր եք սկսում բարեփոխումները, ներկայացրեք ձեր տեսլականը՝ այդ տեսլականն էլ չկա»:
Առավել մանրամասն՝ տեսանյութում: