«Հանրապետություն» կուսակցության նախագահ, ԱԺ նախկին պատգամավոր Արամ Սարգսյանի կարծիքով՝ Հայաստանում այսօր կա տնտեսության, ինչպես նաև տնտեսական արդարության խնդիր։ «Սպայկա»-ի խնդիրն առնչվում է այս երկուսի հետ։ «Ակնհայտ է, որ տնտեսական հարթության մեջ խնդիրների դատական կարգով լուծումը որոշակի ռիսկեր է պարունակում»,- «Առաջին լրատվական»-ի հետ զրույցում ասաց նա։
Շարունակելով իր միտքը՝ մեր զրուցակիցն ասաց. «Հեղափոխությունից հետո մտածելակերպ կար, որ նախկինում եղածը շատ արագ պետք է անցումային արդարադատության միջոցով կամ տնտեսական այլ մեխանիզմներով լուծվեր, հակառակ դեպքում կուլակաթափության խնդիրն է առաջանում։
Մարդիկ այս դեպքում չգիտեն՝ ինչ անեն՝ արդարացվա՞ծ են, թե՞ ոչ, կարո՞ղ են շարունակել ներդրումներ անել, մնալ այս երկրում, թե՞ ոչ։ «Սպայկա»-ի խնդիրը դրա բացահայտ դրսևորումներից մեկն է»։
Ըստ նրա՝ «Սպայկա»-ում առաջացած խնդիրը գերկարևոր է և հրատապ լուծման անհրաժեշտություն կա։ «Չլուծեցինք, ցանկացած գործարար մտածելու է, որ եթե ինչ-որ բան անի, վաղը հարյուր հոգով՝ ԴԱՀԿ-ը, հարկային տեսչությունը, ԱԱԾ-ն մտնելու է իր մոտ ու ինչ-որ գործողություն իրականացնի»,- ընդգծեց Արամ Սարգսյանը։
Մեր զրուցակիցը նաև չի կարծում, թե Նիկոլ Փաշինյանն այսպիսով վրեժխնդրության հարց է լուծում. «Ինչքան ես Նիկոլ Փաշինյանին ճանաչում եմ, ես կարծում եմ, որ նա իսկապես ուզում է, որ Հայաստանը դառնա մի երկիր, որտեղ մարդիկ լավ են ապրում, իրենց հանապազօրյա հացը սեփական քրտինքով, արդար աշխատանքով են վաստակում ու դրանից գոհ են։ Ես չեմ կարող մտածել, որ ինքը վրեժխնդրության առումով է դա անում։ Այն Նիկոլ Փաշինյանը, որին ես ճանաչում եմ՝ նման խնդիր չունի»։
Հարցազրույցն ամբողջությամբ՝ տեսանյութում։