Երեկ Ազգային ժողովը երկրորդ ընթերցմամբ և ամբողջությամբ ընդունեց սեղմած բնական գազի ակցիզային հարկման նպատակով կիրառվող չափման միավորը խմ-ի փոխարեն կգ-ով հաշվելու մասին օրենքի նախագիծը: Նախագծին կողմ քվեարկեց 107 պատգամավոր, դեմ և ձեռնպահ ձայներ չկային:
Ոլորտի պատասխանատուները կրկին հավաստիացրեցին, որ սեղմած բնական գազը կիլոգրամով վաճառելը չի ենթադրելու թանկացում։ ԱԺ տնտեսական հարցերի մշտական հանձնաժողովի նախագահ Բաբկեն Թունյանի խոսքով՝ զարմանալի է, որ գազալցակայաններում թանկացումը համընկավ ապրիլի 1-ին, որը ցույց տվեց, որ գազի թանկացումը գազալցակայաններում այս օրենքի ընդունման հետ ընդհանրապես կապ չունի, և այստեղ մեծ գործ ունեն շուկայի վերահսկողության տեսչությունը և ՏՄՊՀ-ն: Նա պատկան մարմիններին կոչ արեց ուշադրություն սևեռել այդ ամենին, որ որևէ մեկը չփորձի այս ամենից օգուտ քաղել:
Էներգետիկ անվտանգության ինստիտուտի տնօրեն Վահե Դավթյանն «Առաջին լրատվական»-ի հետ զրույցում անդրադառնալով սեղմած բնական գազը կիլոգրամով վաճառելուն՝ նկատեց, որ եթե անգամ այս որոշման արդյունքում գազի գինը բարձրանա, ապա դժվար թե այդ թանկացումն ուղղակիորեն ազդի սպառողի վրա, քանի որ միևնույն է՝ վարորդները շարունակելու են իրենց անհրաժեշտ գազի համար նույն գինը վճարել։
«Այսինքն՝ փոխվում է միայն մեթոդաբանությունը, սակայն գնագոյացման քաղաքականությունը նույնն է մնում։ Սա պետք է որ խնդիրներ չառաջացնի նաև գազալցակայանների համար, որոնցում առկա են, այսպես կոչված, դիսպենսեր սարքեր, որոնք թույլ են տալիս գազն ընդունել կիլոգրամներով, այնուհետև ծավալով վաճառք իրականացնելու համար։ Այսպիսով, 1 խորանարդը հավասարեցվում է մոտ 700 գրամի։ Կարող ենք փաստել, որ, իհարկե, նման մոդելի կիրառմամբ ավելի դժվար կլինի տարատեսակ սպեկուլյացիաներ իրականացնել գազալցակայաններում, ինչպես դա արվում է ավանդաբար»,- ասաց Դավթյանը՝ հավելելով, որ այս մոդելը կնպաստի նաև այն ընդունված արատավոր պրակտիկայի սահմանափակմանը, երբ տարբեր գազալցակայաններում վաճառվող գազի նույն ծավալի արժեքը կարող էր մինչև 20 տոկոս տարբերվել։
«Իհարկե, այնպես չէ, որ հիմա այդ խնդիրն իսպառ կշտկվի։ Ուստի Տնտեսական միցակցության հանձնաժողովն ու շուկայի վերահսկման տեսչական մարմինը մեծ աշխատանք ունեն կատարելու։ Ընդհանուր առմամբ այս ամենը խնդիր է հետապնդում բարձրացնելու հարկային վարչարարության արդյունավետությունը, որի անհրաժեշտությունը վաղուց էր հասունացել։ Այնպես որ, բավական չէ միայն օրենք ընդունել, անհրաժեշտ է հստակ վերահսկողության ու մշտադիտարկման միջոցներով ապահովել նոր մեթոդաբանության կիրառման արդյունավետությունը, հակառակ դեպքում օրենքն ընդամենը ֆորմալիստական լուծման կարգավիճակի կարժանանա»,- ընդգծեց Վահե Դավթյանը։