Ռուսաստանցի ծրագրավորող Վալերի Սպիրիդոնովը, որը նախկինում համաձայնել է գլխի փոխպատվաստման վիրահատության, հրաժարվել է վիրաբուժական միջամտությունից՝ կնոջ և նորածին որդու պատճառով: Այդ մասին նա հայտարարել է Good Morning Britain ծրագրի եթերում:
Սպիրիդոնովը խոստովանել է, որ նա երկար տարիներ երազել է վիրահատության մասին, սակայն այժմ պատրաստ չէ ռիսկի դիմել՝ ընտանիքի պատճառով:
«Ես երջանիկ եմ, որ ամուսին եմ և հայր, ուստի չեմ կարող թողնել իմ ընտանիքը»,- ասել է տղամարդը:
Նա հավելել է, որ 2015 թվականին ծանոթացել է Անաստասիայի հետ: Սկզբում նրանք բացառապես աշխատանքային հարաբերություններ են ունեցել:
Հետագայում աղջիկն իմացել է բժիշկների կողմից առաջարկված վիրահատության մասին և սկսել է համոզել նրան, որպեսզի հրաժարվի: Զրույցները սկզբում բարեկամական են եղել, բայց հետո նրանց միջև ռոմանտիկ հարաբերություններ են առաջացել:
Ավելի քան մեկ տարի առաջ նրանք ամուսնացել են: Ամուսինները մի շարք թեստեր են անցել և երբ պարզել են, որ Վերդնիգ-Հոֆմանի հիվանդությունը, որով տառապում է Վալերին, ժառանգաբար չի փոխանցվում, երեխա են ունեցել:
Ավելի վաղ հաղորդվել էր, որ վիրահատությունը պետք է կատարեր իտալացի վիրաբույժ Սերջիո Կանավերոն՝ Գերմանիայում: