Եվրոպա լիգայի խաղարկության քառորդ եզրափակչի առաջին խաղում վաղը Լոնդոնի «Արսենալը» սեփական հարկի տակ կմրցի Իտալիայի փոխչեմպիոն «Նապոլիի» հետ: Բուքմեյքերներն առաջիկա խաղում ավելի բարձր են գնահատում դաշտի տերերի հաղթելու հնարավորությունը՝ նման ելքի համար սահմանելով 2.45 գործակից: Ոչ-ոքին գնահատված է 3.5, իսկ իտալական թիմի հաղթանակը՝ 3 գործակցով:
Հաշվի առնելով կողմերի ներուժը՝ իրականում դժվար է որևէ մեկին նախապատվություն տալը: Վերջին տարիներին «Նապոլին» Իտալիայում ունի երկրորդ թիմի կարգավիճակը: Մասնավորապես, այս ակումբը չեմպիոնի կոչման համար շարունակ փորձում է պայքարել Թուրինի «Յուվենտուսի» հետ, բայց ինչ-որ բան չի ստացվում: Այս մրցաշրջանում ևս «Նապոլին» չկարողացավ դիմակայել իր գլխավոր մրցակցին: Այս պահին Նեապոլի ակումբը «Յուվենտուսին» զիջում է 20 միավորով, և հավանականությունը մեծ է, որ հերթական անգամ կբավարարվի արծաթե մեդալով:
Եթե «Նապոլիի» համար Իտալիայի Ա սերիայում իրավիճակն այնքան էլ լարված չէ, ապա «Արսենալը» ծանր պայքար է մղում լավագույն քառյակում տեղ ունենալու համար: «Նապոլին» մրցաշարի ավարտից 7 տուր առաջ 7 միավորով գերազանցում է երրորդ հորիզոնականում գտնվող «Ինտերին»: «Արսենալը» Պրեմիեր լիգայում 63 միավորով 4-րդ հորիզոնականում է: Լոնդոնի մեկ այլ թիմ՝ «Տոտենհեմը», 64 միավորով 3-րդ հորիզոնականում է: 63 միավոր ունի նաև «Չելսին», որը, սակայն, լրացուցիչ ցուցանիշներով զիջում է «Արսենալին» և 5-րդ հորիզոնականում է: «Մանչեսթեր Յունայթեդը» 61 միավորով 6-րդն է:
Ծանրաբեռնվածության տեսանկյունից «Նապոլին» որոշակի առավելություն ունի: Կառլո Անչելոտիի ողջ ներուժը կենտրոնացել է Եվրոպա լիգայի խաղարկության և մասնավորապես «Արսենալի» հետ դիմակայության վրա: Ունայ Էմերին, որը նաև կադրային խնդիրներ ունի, ստիպված է պայքարել երկու ֆրոնտներում թիմի առջև դրված խնդիրը լուծելու համար: Վերջին խաղում «Արսենալը» հյուրընկալվելիս 1:0 հաշվով զիջել էր «Էվերթոնին»: Այս մրցավեճում Էմերին նախընտրել էր վերջին հանդիպումներում հաջողություն բերած 3-4-2-1 մարտավարությունը: Իսպանացի մասնագետը կրկին հագեցրել էր դաշտի միջին հատվածը, սակայն կադրային խնդիրները թույլ չտվեցին դրական արդյունքի հասնել:
Ենթադրվում է, որ վաղվա խաղում Էմերին հիմնական կազմում որոշակի փոփոխություններ կկատարի: «Էվերթոնի» դեմ թույլ խաղով աչքի ընկավ հիմնական կազմում հայտնված եգիպտացի կիսապաշտպան Էլնենին, իսկ Օզիլն ուղղակի ձախողվեց: Կարծում ենք՝ չենք սխալվի, եթե պնդենք, որ այդ հանդիպման հակահերոսը հենց Օզիլն էր: Այս երկու խաղացողների վատ խաղալու հետևանքով Էմերիի սխեման ամբողջովին տապալվեց: Պաշտպանները գործում էին մեծ ծանրաբեռնվածությամբ, իսկ առջևի գծի խաղացողները ստիպված էին զբաղվել կանխարգելիչ գործողություններով: Ամեն դեպքում ճիշտ չի լինի ասել, որ Էմերին սխալ մարտավարություն էր ընտրել: Նա օգտագործեց այն գործիքակազմը, որն ուներ ձեռքի տակ:
Սպասվում է, որ «Նապոլիի» դեմ ևս Էմերին կպայքարի 3-4-2-1 մարտավարությամբ: Ըստ կանխատեսման՝ առաջիկա խաղում «Արսենալի» դարպասը կպաշտպանի Պետեր Չեխը, իսկ պաշտպանական եռյակը կկազմեն Մոնրեալը, Սոկտատիսն ու Մուստաֆին: Հենակետային գոտում կգործեն Տորեյրան և Գենդուզին: Կիսապաշտպանության ձախ եզրում կխաղա Կոլաշինացը, իսկ աջ եզրում՝ Մայթլենդ-Նայլսը: Հայաստանի ազգային հավաքականի ավագ Հենրիխ Մխիթարյանը Աարոն Ռեմսիի հետ կգործի ենթահարձակվողի գոտում, իսկ միակ նոմինալ հարձակվողը կլինի Օբամեյանգը: Կարծես թե սա ամենաօպտիմալ կազմն է այս պահին: Ամեն դեպքում չի բացառվում, որ Էմերին խաղալու հնարավորություն տա հենակետային կիսապաշտպան Ջակային և եզրային կիսապաշտպան Իվոբիին:
«Էվերթոնի» դեմ մրցավեճում Մխիթարյանը իր բարձրության վրա էր և կատարեց մեծ ծավալի աշխատանք: Ժամանակը ցույց է տվել, որ կարևորագույն մրցավեճում Էմերին ամեն կերպ փորձում է օգտագործել Մխիթարյանի ներուժը: «Էվերթոնի» դեմ խաղում ևս Մխիթարյանը ենթահարձակվողի դիրքում էր, սակայն խաղային մոդելի փլուզման հետևանքով ստիպված էր ավելի շատ զսպել մրցակցին: Այս դիրքը, կարծում ենք, հարմար է Մխիթարյանի համար, եթե, իհարկե, թիկունքում գտնվող խաղացողները հստակ կերպով կատարեն իրենց պարտականությունները:
Ինչ վերաբերում է «Նապոլիին», ապա այս թիմը սովորաբար խաղում է 4-4-2 դասավորությամբ, որտեղ հարձակողական բռունցքը կազմում են Ինսինյեն և Մերտենսը: Կարելի է առանձնացնել նաև «Նապոլիի» կիսապաշտպանական օղակը, որտեղ տոն են տալիս Կալյեխոնը, Զիելինսկին և Ֆաբիան Ռուիսը:
Եվրոպա լիգայի խաղարկության 1/8-րդ եզրափակչում «Նապոլին» պայքարից դուրս էր թողել ավստրիական «Զալցբուրգին»: Առաջին խաղում սեփական հարկի տակ 3:0 հաշվով հաղթելուց հետո Անչելոտիի թիմը պատասխան խաղում պարտվել էր 3:1 հաշվով: Վերջին խաղում էլ Ա սերիայի շրջանակներում «Նապոլին» սեփական հարկի տակ 1:1 էր խաղացել «Ջենոայի» հետ:
«Արսենալ»-«Նապոլի» հանդիպումը կսկսվի Երևանի ժամանակով 23-ին: