«Ես չէի մեկնաբանի պարոն Ծառուկյանի հայտարարությունը, սա իր սեփական կարծիքն է, և որի հետ ես համամիտ չեմ, ես համարում եմ, որ այսօր կառավարող մեծամասնության թիմը աշխատում է։ Մի շարք ոլորտներում, իհարկե, մենք ունենք մարտահրավերներ, մենք աշխատում ենք այդ մարտահրավերներին պատշաճ կերպով պատասխան տալու, խնդիրները պատշաճ կերպով լուծելու համար»,-«Առաջին լրատվական»-ի հետ զրույցում ասաց ԱԺ «Իմ քայլը» խմբակցության պատգամավոր Հայկ Կոնջորյանը՝ անդրադառնալով նախօրեին Գագիկ Ծառուկյանի քննադատությանը։ Նա ասել էր, որ Նիկոլ Փաշինյանից դժգոհ չի, դժգոհ է նրա թիմից։
Պատգամավորի խոսքով՝ ոչ ոք չէր ասել, որ ամեն ինչ պետք է լինի շատ հեշտ և «հալած յուղի» պես։
«Մենք գործում ենք մի քաղաքական, տնտեսական համակարգում, որը տարիներ շարունակ ձևախեղվել է և, բնականաբար, այդ ձևախեղումները շտկելու համար որոշակի ժամանակ է պետք։ Բոլորս պետք է ջանք չխնայենք, որպեսզի կարողանանք շատ արագ շտկել թերությունները, մեղմ ասած թերությունները, որովհետև կան ոլորտներ, որոնք տարիներ շարունակ բռնաբարված են եղել, և մենք հիմա պետք փորձենք շատ արագ վերակառուցել և բարենորոգել։ Ադեկվատ դժգոություններին ուշադիր ենք, առողջ քննադատությունները անպայման հաշվի ենք առնում»,-ասաց պատգամավորը։
