Մեր օրերում խոսքը շատ է. արդյո՞ք չի եկել լռելու ժամանակը: Մնջախաղի թատրոնի գեղարվեստական ղեկավար Ժիրայր Դադասյանն «Առաջին լրատվական»-ի հետ զրույցում այս հարցին ի պատասխան նշեց, որ աղմուկը սարսափելի շատ է, և լռության կարիք իսկապես կա. «Մանավանդ որ լռությունն ինքնին խոսք է և, ինչպես Սարտրն էր ասում, լռում է միայն այն մարդը, ով կարողանում է խոսել: Պետք է մի քիչ լռությամբ խոսք ասել արդեն, պետք է սահմանափակվել, զսպվել: Ով ինչից պատահի, խոսում է, խոսում են ամեն ինչից, և բոլորը «պրոֆեսոր» են, բոլորի ճակատագրերն ու կենսագրություններն անգիր գիտեն, սարսափելի բան է կատարվում: Այս վիրտուալ իրականությունը պետք է ինչ-որ ձևով տրանսֆորմացվի և դառնա ռեալ իրականություն: Իսկ ռեալ իրականությունը բոլորովին այլ է: Վիրտուալ աշխարհում այնքան կեղծիք կա, այնքան չհիմնավորված բաներ կան, այնքան իրար վրա ցեխ նետել կա, որ ռեալ կյանքում դա չկա, և եթե տեսակետ ես հայտնում, նորմալ լսում են, ոչ ոք չի հայհոյում, իսկ վիրտուալ աշխարհում, տեսեք, ինչ է կատարվում»:
Այս խնդրին անդրադարձավ նաև վարչապետ Նիկոլ Փաշինյանը՝ հայտարարելով, որ դա ազգային անվտանգության խնդիր է: Իսկապե՞ս այս հարցը պետք է լուծվի կոշտ միջոցներով, թե՞ դա կդիտարկվի որպես խոսքի ազատության դեմ ուղղված քայլ: Ի պատասխան այս հարցի՝ Ժ. Դադասյանը նշեց. «Ես այն կարծիքին եմ, որ այդ մասին Նիկոլ Փաշինյանն ամենասկզբում պետք է մտածեր՝ մեկ տարի առաջ, երբ որ ցեխ էր շպրտվում անխտիր բոլորի վրա, ինչո՞ւ դրա դեմ պատնեշ չդրվեց, որպեսզի թույլ չտրվեր հայ մարդը հայ մարդուն հայհոյեր:
Կան խնդիրներ, որոնց նկատմամբ ժողովուրդն իր վերաբերմունքն է արտահայտում, բայց դա չպետք է լինի հայհոյանքով, փնովելով: Այնպես հանգիստ ու ազատ են քննադատում, կարծես իրենք սրբեր են»:
Մանրամասն՝ տեսանյութում: