Կառավարության կառուցվածքի վերաբերյալ մոտեցումները զուտ կառավարության գործն է և իրենց առանձնաշնորհ իրավունքն է. այդտեղ նոր նախագիծ ներկայացնելու իրավական հնարավորություն չկա։ Այս մասին «Առաջին լրատվական»-ի հետ զրույցում նշեց ԱԺ ԲՀԿ խմբակցության պատգամավոր Սերգեյ Բագրատյանը։
«Բայց այդուհանդերձ, ողջունելի է ցանկացած այլ առաջարկություն որպես այլընտրանք։ Մեր կուսակցությունը հարգելով կառավարության առանձնաշնորհ իրավունքը, նոր նախագիծ չի ներկայացրել, բայց դա չի նշանակում, որ համամիտ ենք կառավարության մոտեցումներներին։ Այո, գյուղնախարարությունը որպես կարևոր նախարարություն, պետք է իր այդ կարգավիճակը պահպանի։ Եթե կան թերություններ նախարարության կառուցվածքում կամ գործունեության արդյունավետության հետ կապված, իհարկե, պետք է շտկել, կարգավորել, նոր կառուցակարգեր դնել և նախարարության կարգավիճակը պահել»,-ասաց Բագրատյանը։
Նրա խոսքով նույնը կարելի է ասել նաև Մշակույթի նախարարության մասին. «Սրանք ոլորտներ են, որոնք մեզ համար գերակա նշանակություն ունեն»։