«Ապրիլյան քառօրյա պատերազմից հետո Հայաստանի իշխանության առաջ քաղհասարակությունից մի շարք հարցեր բարձրացվեցին, սակայն այդպես էլ այդ հարցերը մնացին անպատասխան»,- «Առաջին լրատվական»-ի հետ զրույցում ասաց Հայաստանի կառուցողական կուսակցության նախագահ Անդրեաս Ղուկասյանը։
«Ապրիլյան պատերազմի արդյունքում տեղի ունեցավ հրադադարի գծի ակնհայտ խախտում, որը չունեցավ որևէ միջազգային հետևանք։ Այս ամենն ամփոփելով՝ մենք եկանք եզրահանգման, որ տեղի էր ունեցել դավաճանություն, և Հայաստանի ղեկավարությունը սպասարկել է շահեր, որոնք որ բերել են արհեստականորեն այն վիճակի, որից տպավորություն էր ստեղծվում, որ Իլհամ Ալիևը կարող է ինքնակամ պատերազմներ հրահրել, մարդ սպանել և մնալ անպատիժ, իչպես եղավ ապրիլյան դեպքերի ժամանակ, ու առ այսօր Հայաստանի Հանրապետությունը իր որևէ պաշտոնական գործողությունով այս իրավիճակը չի փոխել»,- նկատեց Ղուկասյանը՝ հավելելով, որ անցած տարի Սերժ Սարգսյանի հրաժարականի պատճառներից մեկն էլ ապրիլյան պատերազմի ժամանակ իր վարկն էր և այդ վարկի հետ կապված իր նկատմամբ առաջադրված մեղադրանքները։
Ղուկասյանը մեզ հետ զրույցում անդրադարձավ նաև ապրիլյան պատերազմից հետո իրենց կողմից տարածված տեսանյութին, որտեղ երևում էր, թե ինչպես են հակառակորդի ուժերն առաջ գալիս, իսկ մեր կողմից հրամանատարական կազմը թույլ չի տալիս զեկուցել իրավիճակի մաիսն։ Ղուկասյանի խոսքով՝ իրենց կողմից այդ տեսանյութի հրապարակումը մեկ նպատակ ուներ՝ ցույց տալ, ապացուցել, որ Ադրբեջանն է առաջինը հարձակվել:
«Մեր կողմից հրապարակված տեսանյութը վտանգում էր ապրիլյան պայմանագրային պատերազմի ամբողջ դավադրությունը և բացահայտում էր, որ հայկական կողմն ունի ապացույցներ, որ Ադրբեջանն է կատարել հարձակումը։ Իսկ տեսանյութի հրապարակման անհրաժեշտությունն առաջացավ, քանի որ Վիեննայի հանդիպման ժամանակ՝ մայիսի 15-ին, հայկական կողմը հայտարարել էր, որ չունի ապացույցներ, թե Ադրբեջանը հարձակվել է Հայաստանի վրա առաջինը։ Հայաստանի ղեկավարության կողմից նպատակ կար ծածկադմփոց անելու տեսանյութի առկայության մասով և ձև բռնելու, թե չունի ապացույց։ Իսկ մեր հրապարակումով ապացուցվեց, որ Հայաստանի ղեկավարությունը ստում է ամենաբարձր մակարդակով»,- ընդգծեց Ղուկասյանը։
Առավել մանրամասն՝ տեսանյութում: