Իշխանությունները ներկայումս փորձում են շրջանառության մեջ դնել մի վարկած, ըստ որի, իբր, միջադեպի արդյունքում զոհված և վիրավորված զինծառայողները դեպքից մեկ օր առաջ միջանձնական խնդիրներ են ունեցել, որը վերածվել է վեճի:
Ըստ իշխանական վարկածի` չնայած վեճը հարթվել է, հաջորդ օրը զինծառայողներին տարել են դիրքեր, որտեղ էլ, իբր, նրանք արդեն զենքի օգնությամբ են պարզել իրենց հարաբերությունները:
Ակնհայտ է, սակայն, որ գրեթե մեկ օր որևէ վարկած չառաջադրելուց հետո շրջանառության մեջ դնելով այս տարբերակը` իշխանությունները փորձում են զորամասի սպաներից ու նաև ՊԲ ղեկավարությունից հանել կատարվածի պատասխանատվությունը և մեղքը բարդել միայն զինծառայողների վրա: Ղարաբաղից մեզ հասած տեղեկություններով, սակայն, դեպքի իրական պատճառը խիստ գաղտնի է պահվում, իսկ դեպքը գրեթե նույնությամբ կրկնել է այն, ինչ ամիսներ առաջ կատարվել է Մարտունիի դիրքերում. մեկ հոգին կրակ է բացել զինվորների վրա, ապա ինքնասպան է եղել:
Իշխանության առաջ քաշած վարկածի կիրառության դեպքում քրեական գործ է հարուցվելու հանցավոր անգործություն հանցակազմով, իսկ երկրորդ դեպքում հանցակազմը լինելու է հանցակցությունը, որը շատ ավելի լուրջ ու ծանր մեղադրանք է:
Հիշեցնենք, որ ըստ ԼՂՀ ՊԲ մամլո ծառայությունից ստացված կցկտուր տեղեկությունների`նոյեմբերի 19-ին, ժամը 24.00-ի սահմաններում, ՊԲ հարավային ուղղությամբ տեղակայված զորամասերից մեկի պահպանության տակ գտնվող առաջնային բնագծում տեղի է ունեցել մահվան ելքով արտակարգ միջադեպ: Տեղի ունեցած միջադեպի հետևանքով հրազենային կրակահերթերից զոհվել են ժամկետային զինծառայողներ` Լևոն Սոսի Եսայանը (ծնվ. 1991թ.), Ներսես Վալերիկի Գալոյանը (ծնվ. 1990թ.), Նարեկ Վարդանի Սահակյանը (ծնվ. 1990թ.), Նվեր Մարտիկի Սարգսյանը (ծնվ. 1991թ.): Նույն միջադեպի արդյունքում հրազենային տարբեր աստիճանի վիրավորումներ են ստացել ժամկետային զինծառայողներ`Սարգիս Հակոբի Մելքումյանը (ծնվ. 1991թ.), Խաչիկ Սարգսի Ալեքսանյանը (ծնվ. 1992թ.), Մասիս Մավրիկի Գրիգորյանը (ծնվ. 1991թ.) և Մանվել Արմենի Հազրոյանը (ծնվ. 1991թ.):