Թուրքիայի ԿԸՀ-ն ձայների վերահաշվարկ է սկսում Ստամբուլի ութ շրջաններում՝ իշխող «Արդարություն և զարգացում» կուսակցության կողմից քաղաքապետի ընտրության արդյունքները բողոքարկելուց հետո, հայտարարել է ԿԸՀ ղեկավար Սադի Գյուվենը:
Ավելի վաղ, Թուրքիայի իշխող «Արդարություն և զարգացում» կուսակցությունը դիմել է ԿԸՀ՝ Ստամբուլի քաղաքապետի ընտրությունների նախնական արդյունքների վերաբերյալ, ըստ որի հաղթում է ընդդիմության թեկնածուն:
Ընդդիմադիր «Ժողովրդահանրապետական» կուսակցության թեկնածու Էքրեմ Իմամօղլուն ավելի վաղ հայտարարել էր Ստամբուլի քաղաքապետի ընտրություններում իր հաղթանակի մասին և կոչ էր արել ԿԸՀ-ին որքան հնարավոր է արագ հրապարակել քվերկության պաշտոնական արդյունքները:
Ըստ ընտրությունների նախնական արդյունքների նա 48.79% ձայն է հավաքել, առաջ անցնելով իր մրցակից «Արդարություն և զարգացում» կուսակցության թեկնածու, Թուրքայի նախագահ Ռեջեփ Թայիփ Էրդողանի մերձավոր դաշնակից, նախկին վարչապետ և խորհրդարանի նախկին խոսնակ Բինալի Յըլդըրըմից, որը 48.52% ձայն է հավաքել: Բողոքարկվել է նաև Անկարայի քաղաքապետի ընտրության արդյունքները, որտեղ հաղթում է «Ժողովրդահանրապետական» կուսակցության թեկնածու Մանսուր Յավաշը:
Թուրքիայի իշխող «Արդարություն և զարգացում» կուսակցությունը ՏԻՄ ընտրություններում հաղթել է 39 մարզերում, մասնավորապես, նրա թեկնածուները հաղթել են Բուրսայի, Գազիանթեպի, Տրապիզոնի, Սամսունի, Կայսերիի քաղաքապետի ընտրություններում: Ընդդիմադիր «Ժողովրդահանրապետական» կուսակցության թեկնածուների համար ընտրողները քվեարկել են 21 մարզերում, այդ թվում՝ Անկարայում, Ստամբուլում, Իզմիրում, Անթալիայում և Ադանայում:
Ակնկալվում է, որ ընտրությունների վերջնական արդյունքները կհրապարակվեն մի քանի օրվա ընթացքում, ձայների վերահաշվարկից հետո:
