Ղազախստանի նախագահ Քասըմ-Ժոմարտ Տոկաևն ապրիլի 3-ին ժամանել է Մոսկվա, այդ պաշտոնական այցը դարձել է նրա առաջին արտասահմանյան ուղևորությունը պետության ղեկավարի պաշտոնում:
Ինչպես հայտնել է ՌԻԱ Նովոստին, նախագահի օդանավը Մոսկվայի «Վնուկովո-2» օդանավակակայանում վայրէջք է կատարել տեղական ժամանակով ժամը 11:00-ին: Կրեմլի մամուլի ծառայությունն ավելի վաղ հայտնել է, որ Տոկաևն ապրիլի 3-ին հանդիպում կունենա Ռուսաստանի նախագահ Վլադիմիր Պուտինի հետ: Սպասվում է, որ երկու երկրների ղեկավարները կքննարկեն երկկողմ հարաբերությունները, եվրասիական տարածքում ինտեգրացիոն գործընթացների առաջմղման հեռանկարները:
ՌԴ Դաշնության խորհրդի պաշտոնական կայքի տվյալներով՝ հինգշաբթի Ղազախստանի նախագահը հանդիպում կանցկացնի ԴԽ-ի նախագահ Վալենտինա Մատվիենկոյի հետ: Նոր պաշտոնում իր առաջին հարցազրույցում, որը Քասըմ-Ժոմարտ Տոկաևը տվել է «Եգեմեն Ղազախստան» և «Այքըն» ղազախալեզու պարբերականներին, նա հայտարարել է, որ Ղազախստանը կշարունակի վարել բազմավեկտոր արտաքին քաղաքականություն՝ զարգացնելով համագործակցությունը Ռուսաստանի, Չինաստանի, Եվրոպայի, ԱՄՆ-ի, Կենտրոնական Ասիայի և իսլամական աշխարհի հետ: Տոկաևն ընդգծել է, որ արտաքին քաղաքականության մեջ բազմավեկտոր մոտեցումը, որը Ղազախստանի առաջին նախագահ Նուրսուլթան Նազարբաևի կողմից ընտրվել է անկախության ձեռքբերումից հետո, օգնեց երկրին՝ խուսափել միջպետական ու տարածաշրջանային հակամարտություններից: Բացի այդ, նրա խոսքով՝ այդ քաղաքականության շնորհիվ աշխարհը Ղազախստանը ճանաչեց որպես խաղաղարար պետություն: «Այսօր խաղաղարար առաքելությունը երկրի արտաքին քաղաքականության գերակայությունն է»,- հավելել է Տոկաևը:
https://www.youtube.com/watch?v=o1d42bVcg0Q
